Articles, Articles (Sizang Lai), Sya Kip, The Siyin Baptist

Pawlpi sung Nasepdan (Part 1)

By Rev. D. Kip Thian Pau

Ih kum hong tam vaial a, ih heakna zongh hong khang vaial ciang ih nuntakna sia ngual atu a phatuam vaial tu ih hi hunlam kaphawk vaial hi. Ei Sizangte bang ih Pu Pau Suan, ih Pu Thuam Hang te hong kikheal a kipan a nungta Pathian ih heak sia Kum 100 vaal zo, 106 bang kiphazo hi kasap kikhanthin thei ngawl hetlai thong bana ziam, ci sia kaphawk tawntung hi. Tua ahikom banghang a kikhanthin thei ngawl. ci thu le bangbang kipua tu hi ziam? ci sia hi lai ngual sungah deisakna le itna taw keima mu bangin kong at hi.

Pawlpi thupisak tu
Topa Jesu sia leitung hong om kum thum sung a Pa naa a sep zawkciang, eite mawna taang thina nathuak a, thina in zo zo ngawl a, ni thum ni ciang thokik hi ci sia ei thu umte ii ih pianthakna thubulpi ahi hi. Tasia ih um balai le la Tapidaw (Thu um) kihi ngawl lai hi thong tu hi. Sizang mi hina taw Sizang Pawlpi sung ih min om tek ahihang Pathian min khumna laibupi sungah ih min om bale zong bangma a phattuamna om ngawl bek domngawl thu um ngawl mihing khat sangin heehuai zaw lai tu hi ka ci nuam hi. Lai Thiangtho sungah “Na sa uh le sa vet vun a, na vot uh le vot vet vun” a ci sia ih phawk kik tek tu ka dei hi.

Topa Jesua vantungah a kaato zawkciang nungzuite in ama nasep (Pathian nasep) a taangzai thei natu in Pawlpi (Church) tungtawn in naaseam hi. Pawlpi phut bek dom ngawl in Jesu leeheak pa, Judah Iscoriat taangin Matthias a kitealna zongh ih mu thei hi (Sawl 1:26). Pawlpi upa 12 pha kik a, Pentecost ni a thet ciang bang, Pathian Thaa Thiangtho hong tuak ahikom minam theampo ii a kampau theampo sia amate kampau tekin za uh hi (Sawl2:1 -12). Ci nopna ah thu um te ii kipawlkhopna Church sia Pathian in ompui a hina kimu thei hi. Tua ahikom Topa Jesu leitung pan hong nusiat ciang Church a kipawlkhawm a, Pathian naseam ahi hunlam ih phawk thei hi. Tua Pawlpi sia Lai Thiangtho sungah a pawlpi min a om “ngawl hang minam tung kingaa ngawl a, Pathian Thaa Thiangtho tungah kingaa hi ci zongh ih mu thei hi. Pawlpi keam masabel sia Peter ahi hi. Tua hu in tuni dong ciang RCM te in Pope masabel sia Peter (Jesus nungzui Peter) hi ci in ciamte uh hi. (Sawl. 2:14 pan Peter thusonna kimu hi.)

Nungzui 12 te sia Pathian naseam tu, Jesu thu tetti pang tu a teal sa hi a, Pawlpi sungah nasep tatuam hong tam vaial ciang, Pathian thuhilte huu tu le sum le paai taw kisai nasep teng a dawn tu in upa sali te kiteal a, tuate sia tuni Pawlpi upa ih cite ahi hi. (Sawl 6:1-4). Tua ahikom
Pawlpi khat sungah Pathian thuhilte le Pathian thu son ngawl nasep dang teng a seam tu Pastorte a hu tu in Pawlpi upate a kiteal ci sia a tel huai mama thu khat ahi hi. Tua ahikom Pawlpi (Church) khat sim in

  1. Pathian thuhil tu Pastor te,
  2. A hu tu in Pawlpi upate,
  3. Pawlpi mite ci in nam thum ki om hi.

Tua’ Pawlpi sung a om Pawlpi minam thum a om sung pan nam khat tek in ih nasep ih heak sinsen tu thupi mama hi. Banghangziam ci le Pathian in tuni ama nasep sia Pawlpi tungtawn in naseam ahi hi. Tua ahikom Pawlpi sia manh nei tatak in ih zak thei tu thupi mama hi.

Hi a tung thu teng ih et ciang Pawlpi khat sungah

  1. Ih Lai Thiangtho bu sia ih bulphu tu,
  2. Lai Thiangtho sungah a om ngawl kitekna bylaw nei tu, (By law sia mihing khat le khat tungah a kikapkim tu deina ahikom nei hamtang tu hi)
  3. Pathian naseam Pastor te sia Pathian thu hil tu a, lungdamna thupha puak kakoai tu
  4. Pawlpi upa te sia Pastor te nasepna ah a kisamh theampo hu tu (Pasal kipawlna, Nupi kipawlna, Khangno kipawlna le upa theampo in Pastor te hu tu)
  5. Pawlpi mite sia Pawlpi upate Pastor te hu tu thungetsak tu, tha pia tu ci sia a thupi thute ahi hi. Ci nopna ah Pawlpi sung om Pawlpi mi (member) theampo in vaipuak kinei cingtengh hi ci sia kimu thei hi.

Hi bangin Pawlpi thupisak a, Pawlpi taw naseam khawm a, Pathian ngam khangsak tu a Pathian hong tealsa vive kihi siat hi. Ahitazong a khanthin Pawlpi ih hi thei ngawlna sia ih sepdan, ih omdan a kileebul tam mama lai ahikom, ih nasep, ih kalsuan dan tu sia itna le deisakna taw a nuai a bangin kong pee suk tu hi.

Pawlpi sung nasepdan tu
A tomin ci leang Pawlpi khat ii omdan, sepdan, kizopdan le thukhensatdan te a ngeina om bang in ih zui tu ahi hi. Ei sia Pathian ih heak zawk kum 100 vaal pha pheang ih hi hang Topa Jesu pian pan kipan Pathian he te, ei sang in Pathian a he masa ngam te ii at, laibu te zongh ih sim tu kul mama zo hi. Ei Tapidaw te sia ngeina kician, democaracy ukna taw a kalsuan te kihi a, Lai Thiangtho kammal le zui tu ngeina te zui po leang ih Pawlpi a nuam mama tu hi kasap a kipeauliip tam thei mama hi. Tabang ih suana sia Lai Thiangtho sim vacin a nungta meal ngawl, min le za taw pawlpi upa kitealna a, popularity taw a nga te hong tam vaial hang ahi hi. Tua ahikom 1919 a “His Star” Manglai pan Kawliai ah “ကိုယ္ေတာ္၏ၾကယ္” ci in Rev U Ba ii laibu bulphu in nasepdan, meeting vawtdan te kong at suk tu hi.

Thil dang a vaallai Pawlpi sungah meeting vawtdan bulphu in kong at tu hi. Banghangziam cile meeting vawtdan a maan ngawl huu in ih thu paidan ahi tu bang a, a pai thei ngawlna tarn mama mu kahikom a hun lai kipua tu kadeina ahi hi. Mihing khat papo mindaisak nopna taw kaat hi ngawl a, sonteena kong piak te zongh tel thei natu kadeina le itna taw in kong at hizaw hi.

ကိုယ္ေတာ္၏ၾကယ္ laimai thumna ၁။ အုပ္ခ်ဳပ္စီမံျခင္း (ခ) na ah အသင္းေတာ္သည္ လူတစ္ဦးတစ္ေယာက္ေသာ္၄င္း၊ လူတစ္စုစုကေသာ္၄င္း၊ ခ်ယ္လွယ္ႀကိဳးကိုင္သည့္ အဖြဲ႕မဟုတ္ဘဲ၊ အုပ္ခ်ဳပ္ေရး၌ အားလံုး မွ်မွ်တတပါ၀င္သျဖင့္ ကိစၥအ၀၀ တို႔ကို အမ်ားသေဘာျဖင့္ဆံုးျဖတ္ၾကရသည္။

Hi lai nguicing sea ei Pawlpi te ii ih zui tu thupibel ngeina ahi hi. Mihing tamzaw ii lungkimna taw pawlpi kalsuan tu sia a thupibel ahi hi. Pastor (a) Chairman (a) Secretary (a) pawlkhat te ii deina bang ih zui thak ngawl tu sia thupi mama hi.

Laimai 13. အလုပ္အစည္းအေ၀းမ်ား
၁။ သင္းအုပ္ဆရာသည္ သီခ်င္းဆိုျခင္း၊ ဆုေတာင္းျခင္းျဖင့္ စည္းေ၀းကိုဖြင့္ရမည္။ သင္းအုပ္ဆရာသည္ မလာေရာက္ႏိုင္ပါက တစ္ဦးဦးကို စည္းေ၀းအုပ္ခန္႔ထားႏိုင္သည္။ (Pastor a om nale Pastor in Meeting lampui tu hi)
၂။ လြန္ခဲ့ေသာစည္းေ၀းမွတ္တမ္းကို ဖတ္ျခင္း
၃။ ျပင္ဆင္ထည့္သြင္းရန္ ကိစၥမ်ားၿပီးစီးေသာအခါ ၄င္းမွတ္တမ္းမ်ားကို လက္ခံရန္သေဘာယူရမည္။
၄။ ယခင္အစည္းအေ၀းမွ မၿပီးစီး၊ က်န္ေသးေသာ ကိစၥမ်ား
၅။ ေကာ္မတီမ်ား ျပန္ၾကားျခင္း
၆။ အသစ္ေသာအျခားကိစၥမ်ား။

Hi a tunga lai at teng sia ih et ciang

  1. Pawlpi keampa sia စည္းေ၀းအုပ္ (meeting Chairman) seam tu ci nopna ahi hi.
  2. EC ahile a khakbel EC minute, CC ahile a khakbel CC minute sim tu. hi a, a dangte sim kul ngawl hi.
  3. Last meeting minute sim zawkciang a khialna teng puana nei tu a, pua man zawk ciang kipsakna အဆို၊ ေထာက္ခံ om tu a, thukimna la tu hi.
  4. Last minute pan a thu khensat tu a kisamh lai thu te khat zawk ciang khat kikum tu a, ဆို သြင္း၊ ေထာက္ခံ taw veu in kipsakna nei vateu tu hi.
  5. Committee dang te ii thukhensatna theampo sim tu hi ngawl a, Committee khat sim in pualaakna (Pawlpi heak tu teng reportna lai taw at tu) nei tu a, sim tu hi.
  6. Tua zawk ciang agenda teng pan suk tu hi. Agenda (Kikup tu) thute sia Pastor, Chairman le Secretary te ii lungkim heak teksa thu te hi tu hi.
  7. Meeting sia nai bangza sung vawt tu, nai bangza pan kipanta nai bangza in tawlnga tu cite lungkimna kila masa le pha hi. Nai, cin sia in ih man zo bale pee suak tu lungkim, lungkim ngawl, ahibale bang ni ciang vawt kik tu ci sia committee lungkimna la vateak tu hi.
  8. Tawpna thungetna nei hamtang tu hi.

Teptee tu: – Biakna sung ah meeting vawt ciang chariman (hun uk) in a kilawm bang seam siat tu hi. Secretary sia အခန္းအနားမႈး cibang om ngei ngawl hi.

Zomh lai tu;

Note: The Siyin Baptist Vol 51, Dec 2010 sung pan aki lakik hi.

Advertisements

Discussion

One thought on “Pawlpi sung Nasepdan (Part 1)

  1. Tua hun laika sim sang tu a ka sim kik sia ciang tam tel zaw kisa ingh.

    Posted by Kap Pu | January 16, 2015, 7:34 pm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,486 other followers

Leangna hong haw

  • 45,830 phazo

A LUITE SIM/EN KIK TAWNG

Advertisements