Articles, Articles (Sizang Lai)

MAW NEI TE JESU’N SAANG (IT) HI

Laithiangtho sim na

  1. Matthew 9:9-13
  2. 1 John 9:9-10

THU PAT NA
Pil na sin ih sin ciang, Tan 10 on tu le degree kha peu ma ih nga tu sia a thu bel khat ah ih ngaisut ahi hi. Hiak US ngam bang ci leang 12 grade on tu le degree khat nga tu sia a thupi mama a man nei mama khat ma ahi hi. A hi hang ta bang ah pil na ih nga thei na tu in ih tup na a hi tan 10 or 12 grade ih on na tu sia pre class pa ki pan in,tan khat zawk ciang tan khat sik to ciuteu ciang ki nga ki zo thei pheang hi. US ngam ah inn a sak te lep sa pua sa teng thua to vazing ah inn sak sia ol sak peu ma hi ki ci hi. A hi zong inn khat a sak ciang a foundation teng ah hun tam bel a piak kul veve hi.

Tu ni ei USSBC zong tha nga bang ki pha pheang ah ih basic, ih foundation sia thu pi bel hi ci in ih mu thei hi. Nau sen bang ih ki tuat leang tha luk a pha pheang nau sen ki hi lai hi. Tua hu in tu ni ka thu son tu sia sia, thu um mi khat a tu a thupi bel le a ki sam bel thu ahi hi. Tua a hi kom Jesu foungdation ah nei ah Jesu tung a ki nga, a ki sa pawlpi thu um te khat sim ih hi na tu Topa na thupha hong pia tek ta hen.

MAW NA LEH KHIAL NA
Ih pu ih pa te na maw na le khial na ci in khat le khat tung a hi zong Pathian tung a hi zong kam zak nana nei hi. T a sia sia tu ni in ei thu um te a tu in maw na le khial na ci in ih khen hi. Maw na sia ih pu ih pa le ih pu pi Adam tung pan ah ih lua suk maw na sia hi ah khial na ih ci sia ni sim ih sep thak khial na te sia khial na ci in kikhen hi. Ih lua suk maw na sia tu ma kum 2000lai in Jesu in thinglamte tung ah hong thuak sak na hang in tua maw na pan in hong ngum zo hi. Ta sia sia mihing te a tu in ih foundation ih inn tawdap hi ci sia a thu pi bel le ih up na laingil ahi hi. Tua ahi kom ih luasuk maw na sia ih tu ih ta te tung ah a thet nawn ngawl na tu in ei te theam po ih ih vaaipuak hi ci sia ih ma ngil bua tu hi. Ei ma tek mama zong hi maw na sung pan a h ki suak ta zo ah, tua lungdam na thu a phuang, a thang sak tu in pawlpi ki phut hi ci sia a thu pi bel ih vaipuak ahi hi.( Tu ma khang li lai khawng ka pu te khat na pu Sum Niang te sung panpi Vum Cinn sia a bat in na la ci thu ka sua pui te pawl khat in a heak ciang, ih cidam thei ngawl na, ih khan thi thei na sia ih pi man ih piak ngawl lai hang ah thu pha ki saang ngawl hi ci-in 1993 kum in khui khat taw na kuan aa, tua hun lainah man ah a nget Rupees sawmli pia kik in thupha a na ngen uh hi. Pu te zong in vok khat hong ngaw kik aa, bek dom ngawl hi pi man ah nong piak Rupees sawm li zong na thu pha nga na tu in zangh ta vun ci in hong pia kik hi. Tua ni pan ki pan tua thu hu hau in ko ma unau khawng sia pu te ih pi man ah piak ngawl na vanngit pa ka suak ta uh hi.)

Ta sia bang ma tu ni ih pu Adam tung pa ih lua suk maw na amai na tu in Pa tung ah maw mai na ih ngen ngei ziam? 1John 1:9 na sung ah,” Ih maw na te Pathian tung ah ih pu laak le ama sia akam ciamte keam tu a, thumann thutangte vawt a hi kom ih maw na te hong mai sak tu a, ih ngam tat khial na theampo pan hong thian sua tu hi.” ci in ih mu thei hi.

Tu ni mihing tam mama na ih maw na seal nuam ah ki thi pui nuam zaw ki tam mama hi. Tu in ih maw na ih phuang ah a hi le a tawntung ah tu ki khomsuan tu a, tu ni ih maw na te ih pu laak bua le ih maw na te a tawntung hell sung ah ih tum tu hi. Ei mihing te in maw na le khial na sia a no le a lian ih khen hi. A hi hang Pathian mu na ah mihing theampo sia maw nei ki hi siat ah mi hing te phat na in puan sia bulomtangh bang hi bek hi hong ci hi.(Isaiah 64:6)

Mihing te ih sep thak maw na te bek hi ngawl ih sep tu Topa thu piak, pawlpi thu piak te ih sep ngawl zong khial na ma hi veve hi. Lathiangtho taw a ki le bul ih ngam tat na theampo zong ih khial na te vive hi siat hi.

PATHIAN NI HONG NAI MAMA ZO
America Mary land ah kum 100 sung zin a ling gnei ngawl na mun ah zin hong ling aa, Haricane ih a nawk ngei ngawl na mun tu kum in hong nawk hi. Pathian thu son min thang khat in tu kum 2011 kum( Ih sua kum le ih kum pha za ngawm leang 11 bebek a suak kum) May tha 21 ni Topa Jesu hong tuak suk tu hi a ci hi mihing tam mama linglawng uh hi. Tu laleau ciang October tha 21 ni ciang hi tu hi ci leleau hi. Tua a hi kom tu ni ih maw na te pulaak ah ngup na ih nga tu Topa tung ah ih maw na te pulaak tawng.

Luke 16:19 sim suk inna hi leang Lazarus le Sumhaupa thu ih mu thei hi. Lazarus a mei ma taw sabual tung pan an neng taak ui taw ki tu hi. Sumhaupa ahi le an kham phitphet tawn tung hi tuak hi. Lazarus thiaa Sumhaupa zong thi hi ci LTT sung ah ki at hi. Lazarus sia ngil kial a thi zong hi thei tu aa, Sumhaupa sia an kham lei ah thi zong hi thei phial tu hi. Lazarus sia Abraham kaang sung ah poai an ne in om aa, Sumhaupa sia Hell sung ah sa sa lei a hi kom, tui mal khat ngen hi. Hai khat ngen ngam ngawl hi. Abraham in suak thei nawn ngawl hi a ci ciang tua a hi le ka suapuite nga om lai hi. Lazarus pai sak in na son sak in a ci ciang Abraham in,” Na suapui te Moses le kamsaang te thu hi na ngai ta hen’ na ci san hi. Tua bek hi ngawl in 31 na sung ah,” A ma te in moses le kamsaang te thu a ngai nuam buauh le mithisa khat hong thaw kik hial hang in a um tuan bua tu hi” ci hi. Tu ni hi thu kong son na in Pathian hong sawl na hi aa tu ni ei te maw mai na le khial mai na ih ngen bua ah hi le a hun a bo ciang a ni hong thet ciang ki hai lein tha tu hi ci sia ih phaw tek tu ka dei na ahi hi.

THU KHUP NA
Tua a hi kom tu ni pan ki pan Pathian sia ki theam thei ngawl ah ih maw na le ih khial na te hong mu sinsen a hi man a hun lam in maw mai na le khial mai na ngen tawng. Ei mi hing te na mihing pha te bek ki thu pi sak hi ka le ih biak Topa in mimawte saang(it) pa a hi hi. Mihing a ki nial nam te( Outcasts) te it aa a ma a zuan maw mai na a ngen theampo maw mai hong pia tu in kinging sa in om tawntung hi ci sia ih ma ngil bua tu aa, a ma ngam zai na tu in khatsim khat sim in Topa tung ah ki-ap tawng.

Topa na hi lai a sim theampo thu pha hong pia ta hen.

KIP THIAN PAU

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,487 other followers

Leangna hong haw

  • 44,768 phazo

A LUITE SIM/EN KIK TAWNG

Advertisements