Articles, Articles (Sizang Lai), Pr. Awi Khawm Huai

Philemon Thu Hilcianna

Ngimna:
Sal (slave) a hi Onesimus sia a topa Philemon in Jesus Christ a upna, itna leh hesuakna tawh in upna sung ah suapui bang a san kik natu

Laiatna mun le hun:
Paul in 62 BCE hunpawl Rome thong sung pan a at lai, Ephesians leh Colossians te at hun tawh ki bang hi.

Kuatung ah aki at:
Collossian aa mihau Philemon leh thu um mite tung

Mihing om te :
Paul, Philemon, Onesimus, Timothy, Apphia ( Philemon zi), Archippus, Aristarchus, Ephaphras, Demas, Luke, Mark

Thubulpi:
Khial kimaisakna

Telsonna:
Philemon sea Paul i thu upna sung ah lawmtam khat hi aa, sal nei mihau pa khat hi. Paul in a thongtakna sung ah Onesimus tawh kimuna pan ama in Christ sea a ma ngumpa leh honpa a sanna hu in tawpidaw nuntakna sung ah suapui khat hong suak hi. Upna sung kibanna hang in a Topa kung pan khialna tawh a taikuu Onesimus sea a Topa in a khialna te danpia ngawnngawl in upna suang ah suapui bang in a san natuh ngetsakna ahi hi.

Thupi thu:
Tapidaw nuntakna sung ah zong khial kimaisakna leh khat le khat kitelthiam in ki san thei natuh

Soncianna: Vv.1-7

Onesimus (1867), St. Petka Chapel, Belgrade

1 Christ Jesu atu a, thong a taak Paul le ih suapuipa Timothy in ih ngualtam le ih nasep puipa Philemon tungah, 2Philemon le na inn ah a kikhawm pawlpi le ih suapuinu Apphia le ngalkap bang a, ih seppui Archippus tungah lai kong thaak hi.

Paul in Philemon leh a innkuanpuite, tua inn ah Topa upna sung ah a kikhawm mi te tung a lai thakna hi aa, Jesu Christ thu a sonna huu in thuman ngawl kimawsakna tawh Rome thong inn sung pan a at lai (Sawl.21:10-12, 27-40)

3 Ih Pa Pathian le ih Topa Jesu Christ in thuthiamna le thin nopna hong pia tahen. Paul in pawlpi tung leh mite tung lai thak a at ciang Pa, Ta, Thathiangtho tawh pan (Rm.1:7, I Cor.1:3, IICor.1:2, Gal.1:3, Ephe.1:2, Phi.12:Col.1:2, IThes.1:1, IIThes.1:2, ITim.1:2, IITim.1:2,Tit.1:4)

4 Suapui Philemon awng, thu ka nget simin na min kong lo a, ka Pathian tungah lungdam ka ko hi. 5 Banghangziam cile, Pathian mihing a kici peuma na itna le Topa Jesu sungah upna na neina thute ka za hi. 6 Ka thu ngetna in, thu umte ih hina taw ih kipawl khopna sia Christ taw kikop a, ih nuntakna sungah ih nei thuphate theampo a thuk zaw in ih tel thei natu, a pian natu ahi hi. 7 Suapui awng, nong itna in, kei atu lungdamna lian mama le hanthotna nasia takin, hong pia hi. Pathian mihingte theampo ii thin nong nuam sak hi.

Paul in a laithak dang te bangma in, Philemon in Jesu Christ upna hang in thiangthona le ettetak in a nuntakna huu Pathian tung lungdam a kona thu soncian (Rm.1:8; ICor.1:4; IICor.1:3; Gal.1:5; Ephe.1:3; Phil.1:3; Col.1:3; IThes.1:2; IIThes.1:3; IITim.1:3)

V.8 Hi thu hu in, Christ sungah na suapui khat ka hina taw, sep tu a kul khat sia hangsan takin kong sawl ngam hi. 9 Ahihang nang hong it ka hikomin, kong thuum vawt zaw hi. Keima Paul sia Christ Jesu ii tongciin hi a, ama hu a, tu laitak mama in thongtaak hi napi, hi bangin thuumna kong zangh zaw hi.

Paul in Onesimus a tuh Philemon tung a thumsak ciang ama in nungzui, upa (Apostle,elder) hina vang sea tawh kampau ngawl in Philemon ii Pathian thu a upna tungtawn in thu na sonpui hi. Paul in Philemon ii uk ngawl pipi a thuman tuh sang ama i thin taktawh a san thei tuh dei hi. Na khat sep tuh kilawm leh man hi ci heakna tung tawh in i sep khiat tak teh eima hitheina, vangletna ( authority, power) te i zangh tha ziam? Hi bua leh midang te ii kiapna (commitment) te bulphu in thu i son zaw ziam? Hi sung mun ah Paul in thu-um nungzui mite buaina hong om ciang bangbang in kizom tuh ci sea phatak in limpha hong lak hi.

10 Tua ahikom, Onesimus atu nget sakna khat kong nei hi. Ama sia Christ sungah ka tapa hi zo hi; banghangziam cile thong sungah ka om khop panin, thaa lam ah ama ii a pa ka suak zo hi.11Hunkhat lai in ahile ama sia nang atu in, bangma mannung ngawl hi. Ahihang tu in, ama sia nang le kei atu in a kimangthei khat hong suak hi.

Philemon, Tychicus, Onesimus, Colossae, Rome, Paul (Click on Picture to enlarge)

Hi sung mun ah Paul in Onesimus tawh a kizopna uh sea pa le ta tawh in na son hi. Hi bang in ka tapa ci a sap theina in Jesus Christ upna sung ah pumkhat ahina hang ahi hi. Sila ahi Onesimus sea Paul tungtawn in hong kikhel tak ciang thu upna sung ah suapui khat leh tapa khat hong suak hi. Sila ahi lai in Onesimus sea khiatna nei ngawl nuntakna hikale thu um mi a suak zawk ciang a nuntakna ki khel in a man nei nuntakna tawh hong ki lai hi. Onesimus ci min a khiatna sea “ aki zang thei” ci na ahi hi. John Knox ki ci mipa ii sonna bang hi leh Onesimus ci min sea Paul in Onesimus a pianthak zawk ciang a piak min hi tuh hi ci in son hi. Tua hun lai in sila te in min kician nei ( common name) ngawl hi.

Tua hun lai tak in to te in ama te tung pan khialna khat tawh a taiku sila khat sea that theina tuh thu nei hi. Ahizong, Paul in Philemon tung ah Onesimua sea sila khat bang hi nawnngawl in Christ hang in suapui leh u nau khat bang in a san thei natuh thum sak hi.  A thak kizopna tawh in a muakna tuh le a san tuh in son hi.

12 Keima pumpi za in ngaisutna taw, tu in nang kung ama kong puak kik hi. 13Lungdamna thupha hu in,luangta in ka om laitakin, nangma nong hu tu luangin, kei hong hu tu in, ama sia hi sungah ka keam nuam hi.

Kong puak kik hi ci kammal in khiatna thuk mama hi. Paul in Onesimus sea ama pumpi za in ngaisun aa Philemon in Onesimus tung a thu khensatna theampo in Paul tung ah a vawt hi ci in san sak hi. Onesimus in Paul tawh thong sung a om khop lai in Topa nasepna ah nasiatak in panpui hi. Hi bang in Onesimus in Pathian na sepna sung ah kizangh thei ahi nate a mutak ciang maisang ah ama tawh kop in pattak tuh leh nuntak pui tuh ahoina thu mu hi. Hi thu hang in, apu Philemon tung ah lai a thak tak ciang Paul in Pathian na sepna ah Philemon in ama luang in Onesimus sea awi a, a piakna tuh ngen hi. Philemon in Onesimus sea Paul a tuh pia ziam? Or Pia ngawl ziam? ci thu i et tak ciang Tapidaw tangthu sung ah 68 BCE hun pawl Roman te uk hun Trajan vawtsiatna hu in suangtum tawh Rome ah denlupna ( pawkhat te in ngawngtanna) ciang dong a thuak aa, Saint Onesimus hong suak ci thu ki mu thei ahikom, Onesimus sea Paul a tu pia hi ci in kingaisun hi.

14 Ahitazong tabangin, hu kong ngen hamtang nuam bua hi; tua sangin, nangma thu in na ngamtat tu kong dei zaw hi. Tua ahikom, na thukim ngawl po bangma ka vawt batu hi.15Onesimus sia nang kung panin, tawm vei sung a tai sia, a tawntung na om khop tu hang hi zaw thei tu hi.

Amasa sang i sonsa thu om bang in , Paul in Philemon tung Onesimus a suaktaksak leh a khialna a maisakna tuh hu a nget ciang in ama thu neina zangh ngawl in Philemon in ama le ama thu mantak in a khensat tuh a deina thu i zak leh i heaksa thu a hi hi.. Onesimus in a topa tung pan tawmvei a taina huu in Pathian tawh kimu law aa tu in maisang ah a topa tawh atawntung in a om khop thei natuh thu hoi khat hong suak hi.

Philemon le Onesimus i kizopna sea tu in ahi leh to le sila khat i Christ sung ah suapui khat bang kizopna hong suak hi. Hi bang kizopna sea pawlpi masa hun laitak in thuhaksa buaina khat ahi hi. Hi bang dan buaina te sea tu ni hun dong in sum zonna leh thu-um tapidaw te kizopna sung ah hong om thei tawntung thupiang khat ma hi vave hi.

Roman uk hun lai in sila neina sea mun theampo ah a kizang thu khat hi a hi hun lai tak in , tapidawte in hi a vanglian ngam kiukna sung ah a om a hi, sila khoaina kikheal sak zo tuan ngawl lai hi. Paul in zong hi sila kizuak kikhoiana sea do zo tuan ngawl ahihang, tapidaw kizopna sung ah a lai zawk natuh in na sem hi. Lungdamna thu in i nisim nuntakna, sumzonna leh ngaisutzia te hong ki khial sak hi.

Sumzonna in mihing te hong kikhen sak aa, tapidaw kiitna in mihing te innkuan khat bang in hong kipawl thei sak hi. Paul in sila kikhoina sea bo sak zo tuan ngawl ahi man, thu um sila nei te in a sila te uh suapui bang in ngaisun in thu khualna a nei natuh hanthon hi.

16 Tu in ama sia sila khat lel po hi nawn ngawlin, sila tungsia dinmun ah om zo hi: ama sia Christ sungah ih it suapuipa hi zo ta hi. Ama sia kei atu in bang za in, manpha ziam! Nang atu zonghin, sila khat ahina le, Topa sungah suapuipa khat a hina taw bangza in manpha ziam!

Ano 16 na sung ah Philemon leh Onesimus ii kizopna lui leh a thak son khawm hi. Nidang in sila Onesimus sea tu in Christ sung ah suapui ahina soncian kik hi. Apiangthak Onesimus sea sila khat bang lel hi ngawnngawl in Christ sung ah amanpha nuntakna nga zo aa hi hu in leitung a topa leh Pathian a tuh mi manpha khat suak hi. Christ sung ah kuama sila le to om nawn ngawl hi. Gal.3:28, There is neither Jew nor Greek, slave nor free, male nor female, for you ar all one in Christ Jesus.

Tuni ei thu-um mi te zong Onesimus bangma i hi hi. Mawna sung ah om in i pianthak ma eite zong mawna sila tate i hi a, i nuntakna sung ah Christ sea i ngumpa le tanpa in i san zawk takciang Tha i tate i suak siat zo hi. II Cor.5:17 Mihing khat papo in Christ sungah a om le ama in mihing thak suak a; a nuntakna lui sia bo in a thak in hong piang zo hi. Rom.8:15 Banghangziam cile Pathian hong piak Thaa in sila hong suak sak ngawl a hong lausak ngawl hi; tua hi zaw ngawlin, Thaa in Pathian tate hong suak sak a, Thaa vaangletna taw eite in Pathian tungah “Aba, Pa awng!” ih ci thei hi. I Cor.6: 20, Ama in manh pia a, hong leisa nahi uh kom napumpi uh sia Pathian minthan natu in zangh tavun.

17 Tua ahikom naseppui bangin, nong ngaisun ahile, keima nong saan tu bangin, ama na saang kik in. 18Nang tungah ngamtat khialna hong nei a, leiba hong nei le zong, keima kong bat bangin na ciamtee in. 19 Hi sungah keima khut tatak taw ma in lai hong at khi hi. Keima Paul in, kong lo kik vatei tu hi. (A tatak in ci leang, nangma nuntakna mama zongh kei tungah hong ba nginge na hi sia, kong phaw sak tu kul ngawl hi.) 20Tua ahikom suapui awng, Topa hu in, Christ sungah suapui khat hina taw thupha khat hong seam tan a, ka thin hong nuam sak tan!

Hi ano 17 pan 20 na sung ah Paul in Onesimus tang in dinmun la aa, Onesimus leiba teng seama leiba bang in ngaisun in a lo kik tuh in Philemon tung son hi. Philemon in Onesimus sea bangma nunghei nei ngawl thingtak in a san thei tuh dei hi. To le sila kikal ah kilemna a pian natuh in Paul in hanciam hi.

21 Lai hi sia kong at laitakin, nang tungah bang lungmuanna nei khi ziam cile— kong sawl bangin ngamta bek dom ngawlin, a dik zaw le a pha zaw in seam tu ci in kong he hi. 22Taciang kei atu in inn doituam khat, pua khol sa in na koi sak in, banghangziam cile note theampo ii thu ngetna sia, Pathian in hong saang tu a, note kung hong zuan sak kik tu hi, ci in lametna ka nei hi.

23 Christ Jesu sungah ka thongtaakpui Epaphras in hong paupui hi. 24Tabangma ka naseppui Mark, Aristarchus, Demas le Luke in hong paupui uh hi. 25 Topa Jesu Christ thuthiamna sia note theampo taw hong om khawm tahen.

Ano 23 leh 24 na sung ah Pathian na seppui thu-um dang te paupuina thu son hi. Ano 25 na ah Paul in laithak a at sim in a tawpna leh Jesu Christ i hesuakna tawh khup tawntung hi.Paul i laiat dan ahi hi. Alai thak theampo sea Jesu itna leh hesuakna tawh thu pan in tu sea tawh ma in thukhupna in zangh tawntung hi. ( Rom.16:24; I Cor.16:23; II Cor.13:14; Gal.6:18;Ephe.6:24;Phil.4:23; Col.4:18;I Thess. 5:28; II Thess.3:18; I Tim.6:21;II Tim.4:22; Titus 3:15)

Atom in et kik na:
Vv.1-3: Paul in thu-um mite Jesu Christ min tawh paupuina masa
Vv.4-7:Philemon ii Itna le Upna
Vv.8-22: Onesimus atu Nget sakna
Vv.23-25: A khakbel Vaithakna

Nuntak pui tuh thu:
Ei te theampo zong Onesimus bangma in mawna sila te i hi hi(Rom.6:20). Mawna sung ah thi tuh i hi kimlai in Jesu Christ thiampi lian bel pa in eite taang in Pathian tung ah hong thum sak hi ( Heb.6:20). Eima taang in Jesu in hong dinsak Pathian le leitung mihing te kilaklaw ah thiampi lian bel hong sem in ama nuntak pia in eite hong tanzo ahi man tu in mawna sila tate hi ngawnngawl in Pathian tate hong suaksak siat zo in. Jesu i hong sepsakna leh hong tanna thisan a um mite theampo in Pathian ta za kinga aa (Rom.8:15,16). Tua ahi man,Topa a tuh anungta tuh te i hi hi. Onesimus in Jesu Chrit a san zawk ciang Topa a tuh nungta in a nuntakna a piak bangma ei te theampo in zong Christ a tuh nungta in i nuntakna i piak tek tuh Pathian hong deiksa thu a hi hi(Gal.2:20). I tapidaw nuntakna sung ah Christ a tuh nungta in nuntakna a pia thu-um mi malkim khat tek a suak tuh in i biak Topa in thupha hong pia tahen.

Amen.

Awi Khawm Huai

Bible Study on Philemon

USSBC

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,487 other followers

Leangna hong haw

  • 45,164 phazo

A LUITE SIM/EN KIK TAWNG

Advertisements