Articles (kawl lai)

PATHIAN OMPUINA (Emmanuel)


By Rev. Dr. Cin Khua Zam
(Yuzana, Yangon)

Pathian ompuina ci thu bulphu a, 2010 kum, Yuzana Sizang Innkuante kum sawm cin lungdam vawt in, ka thuhilna hi a, a kuama po tha nga mama ung hong ci ciang, a taangzai zaw tu lametna taw kong at ahi hi.

 Pathian kammal ngai masa tawng: Ngaknu thiangtho khat naungil om tu a, tapa khat hing tu hi. Taciangin a min sia “Immanuel” kiphuak tu hi. Tua in eite taw Pathian om khawm hi a ci nopna hi. (Mate 1:23). Immanuel Pathian hong ompuina mikim tungah hong kilangh tahen. Leitung mihing peuma pawl le lawm a ngai, om khop tu a uuk tek kihi a, thu kisik man ahizong, nuntakna nasepna taw kisai in ahizong, a khua, a pawl, a minam ci bangin kiom khawm nuam tek hi. Tawntung nuntakna ih nga natu Jesu mi bangin hong piang hi. (Jn 1:14)

Pathian in ama meal le lim suun a hong vawt ahi, mihingte taw hong om khawm masa hi (Pian 2:3). Mining te ii haksat hun ciang Pathian ko leang hong ompui lam hong kitelsak tawntung hi. (Late 46:1). Ephet 1:9-10 sungah, Pathian in a tupnasa bangin vawt a, a pawlcing in a khensatsa ama tupna thukuu sia, Christ zanghin eite hong hesak hi. A hun hong tun ciangin, a khuangkhim tu dong a, Pathian vawt tu hi tupna sia, vantung leitung ah bitphuasa theampo kaitua khop natu le ama ii lutang sia Christ ahi natu ahi hi ci hi.

Pathian in van le lei, na tatuamte ni luk sung vawt a, ni sali ni tawlnga in thupha pia hi (Pian 2:1-3). Topa muna ah ni khat le kum tul khat a kilamdanna om ngawl hi ci hi (2 Peter 3:8). Tua hi a, Topa Jesu maa BC kum 4000 le Jesu zawk AD kum 2000 en leang kum 6000 ahibale, Pathian muna a ni luk kici thei hi. Hi kum 6000 sung Pathian in bang tupna thukuu taw Christ kilangh sak zaim? ci en lai tawng. Ni 7 tawlngak ni sia kum 1000 man hun hi.

Pathian in kum 1000 khang khen sim in, mihingte suakta a, ama taw ih omkhop thei natu ngupkhiatna lampi hong ngealsak tawntung a, thuciam, thupiak zongh hong nei tawntung hi. Ahizong, mihing te in Pathian thu ni zo ngawl ahikom, Pathian thutanna thuak tawntung hi.

Adam hun Eden huan sungah thingnga namcin neak thei tu vawtsak a, ahizong huan laizang a om a pha le a sia khentel theina thingnga sia a neak ngawl tu in thuciam pia hi. Na ne uh le na neak ni ma in na thi tatak tu uh hi ci hi. Pathian thu ni pole tawntung nuntakna tu thu ahihang, a thu nit ngawl hu in thaa thina le hawlkhiakna thuak uh hi.

Noah hun ciang in, Pathian in a kiihuai mawna leitung thiansua sawm ahikom, a thutan tu hun kum 100 hun pia a, ngupkhiat natu teambaw vawt sak hi. Mihing te in um ngawlin selno a, Pathian in a kamciam a tun hun ciangin, leitung buppi tui in khumcip sak a, Noah te innkuan le nganhing nupa kop khat tek son ngawl po tui sungah thisiat hi.

Tuipi liim hong bo zawkciang in, Noah suan le paal hong pung kik a, Pathian in leitung dim tavun. Ngam sa vacim le ngasa te na uk tu uh a, zong na ne thei tu uh hi ci in thuciam pia kik hi (Pian 9:1-3): Ahizong mihing te in um zo ngawl ahikom leitung theampo ah ih kithethaang ngawl natu in, khuapi tau saang “Babel” sa tawng ci in “Babel” tausaang hong sak ciang, Pathian in a kampau kitoknoai sak in, leitung mun theampo ah kithethaang kiksiat hi.

Abraham khang hun ciangin, Pathian in kong lakna Canaan ngam lua tavun (Pian 12:1) ci in, Canaan ngam ah a nuamsa tu in kamciam napi, Abraham ta Isaac, Isaac ta Jacob, Jacob ta Israel minam 12 suan le paal te Egypt ngam ah kum 430 sung Pharaoh Kumpi khut nuai ah sila kaai hi.

Moses Israel te mapui tu in, Pathian in sam kik a, ka mite Egypt ngam panin pusua pui in a, kong kamciamna khuinoai le khuaitui a luanna Canaan ngam zuan tavun. Kong piak thupiak sawmte zui in na pai tu uh hi ci hi. Thupiak zui zo ngawl ahikom, Seneal ngam sung pan a piang tawm kum 20 nuaisia khangno teng le Joshua le Kareb bek Canaan ngam theng zo bek hi.

Moses a thi ma in, a mite thunit ngawl hu in Pathian in daan thuaksak a, ngul ngu nei bebek in tusak hi. Athi a na a tam mama ciang Pathian in Moses tungah thing khuam tungah taungul lim khat vawt in a khai in. Ngul tuk a thuak peuma en sak in ci hi. A en susunte dam kik pai in suakta uh hi. A en ngawlte ahile thi suak hi.

Tua taungul kikhai sia, Topa Jesu in mimawte daan thuak taang hong thuak sak tu a, thinglamtee tung hong kikhai lup tu limlakna ahi hi. Pathian in hi bangin a hun a hun in hong tonpuina le suatakna lampi hong thunsak tawntung hi. Ahizong, mihingte in ih hanciamna, ih phat ih hoina, ih hatna le ih zui zawkna om ngei ngawl ahikom, mi theampo mawnei suak zo a, (Rom 3:23) Pathian ii ngup natu in hong ompuina taw kikhuala siat zo hi.

Ahitazong, Pathian ii tupna thukuu ahi, a Tapa Jesu Christ taw a khuangkhim natu thu ahi hi. Hallelujah!

Daniel 3:1-26 sung ih sim ciang, Nebuchadnezzar kumpipa milim vawt a bia nuam ngawl, milim mai ah a kun nuam ngawl, Jew mi Shadrach, Meshach le Abednego te meiphual sungah denna in a nei uh ciang, Nebuchadnezzar kumpipa in meikuang sungah mihing li kot vavaa in mu a, amate kiheencip ngawl si, liam zongh liam beak ngawlin a lina pa sia bang vantung lalang khat taw kibang hi ngawl ziam? ci in dongh hi.

Shadrach, Meshach le Abednego a lianbel Pathian ii naseamte awng, hong pusuak tavun; ci in sam hi. Kumpipa in hi mi thumte Pathian in ompui ahi hunlam tel in pualaak hi.

Ei tek zong haksatna cimawk hun khat ih thuak ciang, ei le ei ih kisuatak zo batu a, tua hun ciang Pathian kammal tungah kinga in ama ko leang ama in hong ompui pole, ih haksatna theampo hong zawpui tu ahi hi. Hallelujah!

Cope Topa khamtung ngam ah Pathian thuson in a vavaa hun lai in ka pa Ngo Thang (Dolluang) zongh tawlkhat sung a nung ka zui ngei ci hi. Falam ngam Ngawn khua khat ka tum uh ciang in hong nol a, hiak khua sungah Pathian thu son thei ngawl tu nu hi. Ko Doai bia zo khu hi. Na son sawm hamtang uh le thatlum tu khu hi. “Pathian thu na son nuam uh le hong zui tavun” ci in a khua pan a khuala mama ngam tawngtolna mun khat hong lak a, tuak sung mun ah son tavun, hong ci a, ni tum dektak zo si, koima kizuan man ngawl tu ahikom, ngiaphual vawt in, thing tom in meiphual ka thut uh a, nitak an ngawlin ka lum uh ci hi.

Cope Topa sia meitaang ah Lai Thiangtho sim a, kei sia toi mama si, ka ngil kial si tana ka lup thei bangin ka lum pai ci hi. Khang khat ka law ciangin khua ka et le Cope Topa sia Lai Thiangtho a na sim lai a, ka kiim teng ka et le ka kung mama ah sahang pui khat in topui ngenngun thong a, Topa Topa ei bang law thong tu hi ziam? ka ci le, Cope Topa in “Ngo Thang awng lau heak in” hi sangah a lian zaw khat om lai hi hong ci a ka et le ama nungsang ah a lian zaw lai khat na lum lai hi.

Cope Topa in Ngo Thang awng khua mite in hong thalup nop hang Pathian na ei hong ompuina hizaw hi. Mu kik in bangma law ngawl tu hi hong ci ciang ka thin hong nuam pai a, sahangte ka et kik ciang ko hong petlum tu lim hi ngawl a, ih ui khoaite in hong it a, ih kung khawng a hong luppui tu bangin ka ngaisun thei a lumkik in ka mukik thei pai hi ci hi.

A zingsang khuavak ciangin inn lam zuan in ka cia kik uh a, lui dung khat ka zuzui uh le suang pheak pui khat ii tungah sakhi la khat sahang te in silup sa in na koi a, Cope Topa in a peang pan khaito in, Ngo Thang awng Pathian in ih zing an tu hong pia hi. Mei thut in; sakhi sa ih ne tu hi hong ci a, em in ka kham teak ka neak zawk uh ciang tam mama innkuanpuite ka puak lai uh hi ci hi”. Cope Topa sia khual a haw ciangin kawngnam, meibawn le cii pua tawntung hi tuak hi.

Pathian in mimaw eite hong it lalawm ahikom in ama hun khen a khang a khangin tawntung nuntak ih nga thei natu lampi hong thun sak a, ama thu tupna thukuute a khuangkhim natu in Jesu Christ taw hong hesak hi. Tua Jesu a min sia Emmamuel eite taw Pathian hong om khawm cina ahi hi. Nang le nang kisaan tawm zaw heak in a, Pathian ko in. Tua hile “PATHIAN OMPUINA na nga tu a, a kidim nuntakna na nga tu hi.

Hi thuhilna a sim, a zate theampo tungah Emmanuel Pathian ompuina ahi thinnopna, suaktakna, tawntung nuntakna le nopsakna om tawntung tahen. Amen!

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 46,699 phazo

A LUITE SIM/EN KIK TAWNG

Advertisements