Articles, Articles (Sizang Lai)

Banghangin Pathian In Moses Sam Ziam?

Pusuana 3:1-22 na sung ih et ciang, Pathian in a mite a suatak thei natu in Moses a sapna thu kimu thei hi. Israel mite in Pathian thu a nit uh lai in Pathian in thupha pia a, a thu a nit nawnngawl uh ciang, daan pia in Egypt ngam ah kum ‘400’ sung bang sal taangin ngual sila in na om uh hi

I. SAPDAN TATUAMTE (Types of Calling):-

1. Isaiah (Kamsangpa):
Kamsang Isaiah sia Pathian in, khua ngai a Biakinn sungah thungen in a omna pan sam a, Pathian taw a kimu ciang a nuntakna kiphawk in, kei mikiihuaipa, Pathian sia Thiangtho, Thiangtho, Thiangtho hi ci in pok a, a nuntak hunsung tawntung thianthona in keamcing (Control) hi. Pathian taw a kimu po ciangin, “Topa aw hiak om ing hong sawl tan” ci hi Tuni nang le kei zongh in Pathian sapna za a, Thu um mi a suak ih hi komin ih nuntakziate ei le ei ki enkik tawng, Kamsang Isaiah taw bangbang ih hi ziam?

2. Ezekiel (Kamsangpa):
Kamsang Ezekiel sia Babylon ngam ah sal taangin a na sepna luisung pan Pathian in, vui suangval vasak a, tua taw na sam hi (Ezek 3:16-21). Ih Tapidaw nuntakna sungah Pathian in haksatna le a lauhuai tatuamte taw hong sap maa in, ei le ei kiphawk in, Topa ama kung zuan paiih thei leang kimeet zaw tu hi.

3. Moses:
Moses sia Pathian in sawlhing khat kaangsak (Burning bush) in tua taw na sam hi (Exo. 3:10) A nuntak hun nunung kum ’40’ teng sia tua-sapna in keam (control) a, lampui in hangsan sak in tha muang sak hi A mite in Pathian thu ni ngawlin Pathian a langdo ciang zongh in Pathian mai ah ding a, ka mite mawna maisak in, na maisak zo batu le keima min sia Vantung Laibu sung pan phiat in ci in ama atu sangin a mite atu a bulphu zaw lampui pha mama khat ahi hi (Exo 32 12, 32).

II. PATHIAN IN MOSES A  SAPNA II NGIIMNA (The Purpose of his call by God):

1. A mipui Israel te tha a piatu:
Israel mite in Pathian thu ni nuam ngawl uh hikale daan thuakin haksatna, zawnsaknate a thuak uh ciang kisikkik in, Pathian tungah kapin, tau in, au in hong kiko uh tak ciang Pathian in tua a mite ii kaana le huu ngen in a kikona uh awte a zaak ciang om thong thei ngawlin, a suatak thei natu a lampui tu le, Na kaa, na tauna uh le na au nate Pathian in hongza a, hong hun tu hi, ci in a mite tha a pia tu in Moses a teal ahi hi.

2. Pharaoh Kumpipa mai-ah A mite luangin maitang kisi in a dingtu (To stand vis-a-vis before King Pharaoh):
Moses in a mite ii ngim thuakna te huvau a thin na in, Pathian mai ah thungen bek hi ngawlin, Kumpi Pharaoh mai ah maitang kisi in a din tu zongh lau ngawlin kiita ngawl hi. “Ka mite pusuak sak in , ” (Let My People Go) na ci hi. Tu lai lampui khat hi leang ei zongh Moses bangin Kumpite mai le Pathian mai ah ih ding ngam tu ziam? Tu laitak ih Zomite le ih Zongam ii dinmun lungngai leang, ih ngamle ih lei ah nuntakna haksat hu le ki ukna a phat ngawl hu in, ngual ngam ngual lei ah, ngam thumna zongin kipai tek hi. Tua thu taw kisai in mi pawlkhatte in, leilot thu taw a pai uh hi a, hamsiatna thuak tu hi, ci in a ngaisun zongh ki om a, tuabang hi bo pai tu a kul hi zo hi a ci zongh ki om hi. Bangbangpo ahizongin, khat le khat ih muna le ih mudan kibang ngawl ahikom, a pai theite pai in, inn sang panin maa a pangtheite in maa pang a, ih omna papo panin hanciam in, Pathian it in, Pathian min le a ngam zai natu le ih ngam le ih minam atu in maa ih pan tu ahi hi. Hi thu huvau in mite in ih mite hong siat son in hong zawngsak le ih mite atu in a dinpui ngam tu Moses bang lampui, ih hi tu kisamh hi.

3. A Mite Sal Tanna Panin a Suatak tu:
Pathian in a mite ngual ii nenniamna le vawtsiatna thuakin a omna uh panin suatakna a nga natu ngiimna taw Moses a na sam ahi hi. Lampui khat ii dinmun zongh mite in leitung thu, thaa thu ah nenniamna, le vawt siatna a thuakna pan a suatak tu in Pathian hong teal ahi hi. Saltanna pan ih mite suatak in, suatakna pan thupha a saan thei natu sia lampuite ii vaipuak Pathian piak ahi hi. Moses in a mite ii suatak natu bangza ngim thuak a, bangza in haksatna le vawt siatna thuak ci sia Lai Thiangtho tungtawn in ih tel le ih heaksa ahi hi. Tua ahikom mihing khat papo in a dinmun lui le a omna lui pan thupha a saang thei buale, thupha a saan theina mun a zuat tu hizaw hi. Tua atu in a buaisak thei le a nawngkai sak thei tatuamte sia lampuite in Moses bangin kumpite mai le Pathian mai ah dingin vaipuak la a, vaihawm sak tu ahi hi

Pathian in Moses a sapna a thupibel in, saltanna, vawtsiatna le zawnsakna pan a mite suatakna le thupha saanna khui noai le khuei tui luanna mun ah lampui in paipui tu a hina thu hi bang kicing bua kale khat le khat tha kipia in, a kihanthawn nuam ih hi hi. Moses bang lampui pha ih ngam le minam sung panin Topa Pathian in tampi hong piangsak tahen, Amen.

.

Heaktu: SCC magazine pan

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,487 other followers

Leangna hong haw

  • 45,164 phazo

A LUITE SIM/EN KIK TAWNG

Advertisements