Articles, Articles (Sizang Lai)

Zawna Sia Topa Aa Hi, Yehowah Nissi

By Tg. Pum Za Nang

Thu masa in phawtu zawna sia mihingte kipiak thathong thei hi ngawl a, Pathian aa, Pathian neisa, Pathian kung pan bek a kinga thei ci sia ciamtee tek masa tawng. Lai Thiangtho OT sung Israel mite nuntakna ih et ciang a tamzaw a hun uh sia ngalsimna in na zangh zaw uh a, tua ngal a simnate sungah zawna a pia sia Pathian a hina zongh, he mama, tel mama ahikom, hi bang kammalte hong piang ahi hi. YHWH taw a kingawm Pathian min pawlkhat taw thaa la khawm tawng.

1. Topa sia ka zawna (dial) hi Yehowah Nissi
Israel mite San Tuipi a kan zawk uh ciang ngalsimna ma hong nei paih leleau in, Amelek mite taw hong kido a, haksatna tampi kawm sung pan Pathian in zawna ngasak leleau hi. Moses le lampui dangte lungdam mama in ngalsimna theampo ah zawna a piaknate hangin “Topa in keima zawna hi” ci in “Jehovah NISSI” ci kammal hong piang hi. Tua ahikom ei ih minam bup atu Pathian sia bang ih ci tu ziam?

2. Topa in hong sik hi Yehowah Jireh
Hi kammal hong pianna sia Abraham in a tapa taw Pathian biakpiakna mun pan hong piang ahi hi. Biakpiakna mun Moriah ah (Monah mualvum hi ngawl) Moriah a kici sia mualdung saupi hi a, Jerusalem khuapi omna mun (2 Khang 3:1) le Calvary zongh tuak sung mun ma hi, Lai Thiangtho thiamte in ci hi. Ih tel tu khat ah Yehowah Jireh ci min sia Pathian biakpiak natu ama le ama hong kisik pa hi cina ahi hi Stn. Pathian min taw crusade/camp vawt natu a kisamhte theampo Pathian ma in hong sikna ahi hi. Inntung, sumbuk tung khawngah Jehovah Jireh ci khawng ih suang le, Pathian hong piak ahikom Pathian atu ih zak hong kul tu hi.

3. Topa in Tuu bangin hong cing Yehowah Ra-ah (Ps. 23)
Hi kammal sia kumpi David kung pan hong pai ahi hi. Kumpi tokhum tungah a to maa in dui sungah tuucing in a om thilthial hun sung Pathian in ama tuu cin sangin a muanhuai zaw a, a cin a kepnate kumpi tokhum tungah a to hun ciang tel seseam in phawk seseam hi. A nuntak sung theampo Pathian kepnate hangin Topa in kei hong cing tuucing pa (Jehovah Ra-ah) ahi hi, naci hi. Kumpi David sia a nuntak hun sung ngal haubel pa zongh ahi hi. Ahihang Pathian sia ama a cing tuucing pa ahi hunlam he ahikom in lauhuaina le dipkuat huai thute phulthak ciang ngangawn in na molpum le na ciangkhut in kei hong lungmuangsak hi na ci hi Amen.

Topa sia ih ngalte mai sese ma ah an hong pia pa ahi hi. Ih ngalte mu ngawlna ah pia ku ci bang hi ngawlin ih ngalte mai ah an hong lui pa ahi hi Amen.

Pathian neisa Pathian ii tuu ih hi phot tu thupi masa hi. Tuasia ciang ama inn (tuu huang) sungah a tawntung in thinmuang takin ih teang (om) tu a (v. 6) Topa sia eite atu tuucing hoi pa hi tatak tu hi. (Jn. 10:11)

4. Topa eite hong damsak pa Yehowah Rapha (Ex.15)
Jehovah Rapha taw kisai sia Rev. W. Khai Tual in kicing takin suaksak ngei zo a, kei tampi kong son nawn buatu hi. Ih minam atu le ka tha ngana tawm kong at hi.

Topa hong damsak pa, Topa sia eite ii damna hi ci in SRBA in 2011 atu ih thubulphu pi in ih koi hi. Hi thu ka zaak ciang ka lungdam lalawm a, aw ih ngam ih lei atu a kisamhbel sia ma hi ngawl ziam? Hi thulu taw kalsuan tu a teal suapui sya, syamate tung zongh ah lungdam kong ko hi. Pathian in ih kisapbel sia ma hong phawksak hi na cici ing.

Topa sia eite hong damsak pa hi takpi tu ih uuk na ziam? Ih khensat takpi na ziam? ci in zongh kong dongh nuam hi. Banghangziam cile Topa hong damsak tu ih uuk takpi le ih zui tu, ih nit tu thu pawlkhat om hi. Israel mite San Tupi a kan zawk uh ciang haksatna tam mama thuakin ni thum sung bang an ne ngawl, tui dawn ngawlin senneal ngam sungah khualhaw uh hi. Nuntakna tui Jesu dawn ngawlin, nuntakna an ahi Jesu ne ngawlin khual ih haw zo tu ziam? (Ih lampui tha zo ziam?) Mipite in an du, tui du in, tui omna an omna, pawl dang mun dang ah tai vadel zo hi ngawl ziam? Mipite phunna na za zo ziam? (V. 24) Moses in thinsung takpi taw thungen hi (v. 25) Amen.

Thinsung takpi taw thungen tawng Ih ngen takpi le tui a kha mama (v. 23) sia a kidawn thei nuntakna tui hong suak tu hi. Ih minam bup ih ngambup in damna ih nga natu Pathian in thupiak hong nei hi (v. 24, 2 Khang. 7:14). Tua thupiakte ih zui takpi le eite atu Pathian sia Jehovah Rapha hong hi takpi tu hi. Egypt mi Pathian a bia ngawl mite tungah a tunsak natnate kong tungsak buatu hi ci kamciam hong pia hi.

5. Ngupkhiatna in Topa aa hi, Salvation is of the Lord
(Jonah 2:9, Ex.14:13, Ps.3:8 KJV)
Jonah nuntakna tawm en pak tawng. Jonah sia Pathian sawlna a nit ngawl ciang lametna ngangawn bo liangin haksatna thuak hi. Leitung thu taw ngaisun leang ngasa pui ngil sungah nuntak thei natu lampi om ngawl hi. Hi hi, suapuite awng, Pathian sawlna ih nit ngawl ciang lametna tam veipi tak ih taan hi. Leitung vai bangin Pathian in thu hong khen hile nuntak zawk nawn ngawl natu khialna le mawna taw a kidimte ih hi hi. Pathian hong hesuakna hangin kisiik kik thei natu tunidong ciang nuntakna hong kopnate tel in ih khialnate pan Jonah bangin kisiik in Pathian hong thupiakte ni tawng, zui tawng. Tuabang ih hile Pathian sia ngupkhiatna hong pia pa suak takpi tu hi. Ih minam bup in ih khialnate phawk tawng. Ih minam bup in ngupkhiatna sia Topa kung pan hong pai hi hong ci theisak kim tahen.

6. Zawna sia Topa aa hi Yahowah Nissi (Ex.17:15)
Thu masa ih son sa bangma in zawna sia Topa kung pan bekin kinga thei hi. Ngalsim tu in a kingingsa a om ngalkapte le siphu leangteTopa in panpui buale a lui thathong ahi hi (Pau 21:31). Zawna ih ci sia mi pawlkhatte nguallel bangin tai napi zawna, ngual zawna hi thei hi. Pawlkhatte a zo kisa, ngualzo kisa in dedel hi napi lelna, ngual lelna hi thei hi.

Saul kumpipa in Pathian thu a nit nawn ngawl ciang Pathian in ama a laih tu Jessi tapa David a tealna thu a zaak ciang David thalup tu in dedel hi. Zo kisa in dedel napi a lel hunlam kiphawk tha ngawl hi. A tai theampo zongh a lel man hi siat ngawlin, a del theampo zongh a zaw man hi siat ngawl hi. Phak laak manin zongh a dedel na hizaw thei hi.

Thukhupna: Zawna, ngual zawna hong pia pa sia Pathian a hina phawk tek tawntung tawng. Pathian atu ih sep ngamna tatan ah a kisamh bangin ama le ama hong kisik lel tu ahikom seam ngam tek tawng. Pathian tuu huang sungah ih om le a tuute atu ama sia tuucing pha pa ahi hi. Topa thupiakte ih ni le ama sia eite hong damsak pa hi tu hi Amen.

____________________

Heaktu: The Siyin Baptist sungpan akila kik hi.

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,487 other followers

Leangna hong haw

  • 45,164 phazo

A LUITE SIM/EN KIK TAWNG

Advertisements