Articles (Sizang Lai)

Jesu Ii Na Lamdang A Vawtte

Tui sapitui a sua sakna
(na lamdang a vawt akhatna)
John 2:1-11

A hun le amun
Galilee ngam Carpenaum khua nai, mual tung ah a-om Cana khua ah nithum a taam zawk ciang a nungzuite ii a up thei natu a ngaisutna in Jesus ii nalamdang avawt phit bel ahi hi.Tua mopoai ah Jesus ih nu Mary zong ki hel thei aa, Laithiangtho sung ah Jesus ii nu, Mary ci vateu in a at sia ngaknu thiangtho pan a piang Jesus sia min nei lei ngawl lai aa, Jesus sia ngual heak tu a deina khat ahi hi.

Mo ki tenna khat papo ah Jesus (Pathian) a om tu thupi
Mopoai vawtte ii Jesus a sap sia tua mopoai sia athiangtho ki tenna hi tu aa, Jesus aki hel hu in a mopoai zong khiakna nei ahi bangma nupa ki tenna khat papo ah Jesus (Pathian) lung kim ki tenna ahi tu a thupina zong ih mu thei hi.

Mopoai sung ah a zak sapittui a bo ciang mopoai vawtte in thintoi masa ngawl aa, Mary ii a thinbot phaphot sia innteakte a maizum ngawl natu khat le a tapa in seam po le piang thei tu hi ci in Jesus a muanna thu ki mu thei hi. Jesus in ka sep ka vawt tu hong son heak in ka hun hong cing ngawl lai hi ci ziau lel hi. Jesus in na khat papo a sep tu sia hun lapla cibang om ngei ngawl hi. Lam khat pan Jesus in a nu thu ah nungta hi ngawl aa a pa Pathian thu bek taw nungta ahina thu zong a lak nopna hi.

Mary na a tapa thu ni
Jesus nu Mary in a tapa pau teng sia tanute (Poai vaipuak neite) tung ah a tapa pauna teng son ku vakhian hi. A tapa sawl bang in seam vun ci hi. Hi thu ih et ciang midangte sawl bang ngamta tu hi ngawl aa, Jesus sawl bang a ngamtat tu a deina zong ahi hi.

Thambealte sung ah tui dimh sak aa sapit tui suaksak
Galon 30 veu ata thambeal 6 sia tui adim sung tu in Jesus in sawl hi. A hun acin te sapittui suak sak hi. Poai uk pa ngangawn zong in he ngawl aa, a piak uh ciang lamdang sa lunsat uh hi. Jesus in na lamdang khat a vawt nop ciang van/na khat papo tungtawn in seam hi. Thambeal sung ah tui a sunh zawk ciang sapittui suasakna taw na lamdang lak hi. Poai uk pa in mopuipa sam aa, ngualdangte ii sapittui sia khul vaial aa, nang in sapittui sia ciik vaial hi. ci in ko hi. Jesus om huvau in tua mopoai sia nidang aom ngein gawl mopoai suak hi. Mihingte zong khuangei ciang ki ham vaial hikale Jesus nei po leang ki no sua tawntung ci sia zong hong phawk sak hi.

Hi bang aa, na lamdang a vawtna huvau in nungzuite zong in Jesus sia um tuam/muang tuam hi.

Ulian pa Ii A Tapa A Dam Sakna
(Jesus ii na lamdang a vawt anina)
John 4:46-53

Ulian pa in atapa dam na tu hu ngen
Jesus sia Jerusalem ah Paisan Poai asiim na pan Galilee ngam Cana khua hong theng kik hi. Tua Cana khua ah kumpi naseam ulian khat (Noble man, MP) khat taw ki mu hi. Tua ulian pa sia Capernaum ah om atapa ci na zawm sia pai le dam tu um ahikom Capernaum ah apai na tu hu ngen hi. Jesus in MP pa up na amu ciang Isarael te ih up na saang kho zaw ah Isaraelte sia na lamdang sep na om ciang bek um thei ci sia phawk ahi kom, “Pai tan, na tapa nungta tu hi!” ci ziau hi. Jesus dei dan sia mihingte in na lamdang vawt ciang bek um ngawl ah aup na kho tu sia dei hi.

Ulian pa up na hang atapa dam
Na lamdang sep na sia (1) Thu ku,(2) Thuthak zong hi aa(3) Ngei na saang ah athuk zaw/ ngei na val ah nasep na khat hi. Jesus ih dam tu hi aciciang ulian pa zong in um lel hi ta na cia pai hi. Inn athet ciang atapa na dam zo takpi hi. Bang hun laitak dam ziam ci in adok ciang a inn om te ih a son hun sia Jesus ih ,”Pai tan natapa nung ta tu hi” aci hun lian in asuuk thai ah adam hun lian ana hi hi. Hi bang in na lamdang asep na hang in ulian pa le a innkuanpuite Jesus sang uh hi.

Kum 38 Peang Zaw Pa A Dam Sakna
(Jesus ih na lamdang a vawt athumna)

John 5:1-8.

Tui kilok ciang a tuak masa sia dam theina Bethesda tuicing
Galilee ah na lamdang a vawt zawk ciang, Jerusalem Biakna poai ah Jesus pai hi. Judahte ii azeksa ngeina (Pihnyat) a zuina khat ahi hi. Tua poai sia Jerusalem vateal ah vawt kul aa, Jesus ii amasaphit bel a paina ahi hi. Jerusalem tuu kongpi hui ah Bethesda tuicing khat om hi. Tua tuicing ii kiim ah talaap (Tum theina kong) mun nga ah om hi. mihing tam mama taak theina tual zaihial khat zong om tuak hi.

Tua tuicing aki lok laitak a tuak masa bel sia dam valian hi. A lamdang mama khat in a tepte uh thu khat ahi hi. A tui ki nok tu hun sia kuama in he khol ngawl hi. Laithiangtho thiam T.G Bellet ii sonna pan,” Atichia ngawl het siama lam en in ngak tek uh hi. Jesus a om hunlam zong phawk nawn ngawl uh hi. Mittaw peang baite sia ki phul vapawk liang uh hi. Leitung mite ii ih heak vacin ngawl muanmawkna taw ih ngamtat sia daan hi tuak hi. Mihingte sia Pathian ki mangil aa, setzukte bang ki hi thong ngawl ziam?” ci hi.

Vantung mi khat hong tuak suk aa, a sau ciang tui ki nok hi ci in um uh hi. Mu nuam, he nuam tek uh ahiciang cina ngawl te zong pai ngeeinguui hi tuak hi. Tui aki lok lian laitak a leang masa phit sia dam tu ahikom ki nging sa in om kiukiau tek hi tuak hi.

Kum 38 cinapa tung Jesus in na dam nuam ziam ci in dong?
Tua a ngakte sung ah kum 38 sung a ngakpa sia a mu po ciang, a mu ngei ahi ngawl hang natna ngongam nei aa, dam nuam ahi hunlam, kum tam mama ngak zo ahi hunlam he pai hi. A hesuakna sia pusuak aa, pasal pa mun ah,” Dam nuam ni ziam?” ci in dong hi. Cinat sia haksa mama aa, mihing theampo ii cidam nop sia Jesus in he hi. A ngim huai mama sung pan suataak nuam hi. Tua pasal pa sia a hu tu, tui ki nok laitak a sawn tu kuama om ngawl ahi hu in kum 38 a ngak zawk hi zo hi. Mihingte eima le eima ki suakta thei ngawl aa, hong hu tu khat akul hunlam hong phawk sak hi. Mihing tetek ki suanna zong bangma pen ngawl hi.

Jesus in,” Na luppha luak in aa, pai in” ci.
Tua pasal pa sia kum 38 bang ngak zo ahiciang a lupna phak khat a nei sim ngawl adang bang nei ci sia ki he ngawl hi. A luppha a lua zawk ciang pai a sawl hi.” Pai in,” ci kammal sia in a ci a dam zawk ciang to thong nawn ngawl aa, a zaak thu son in pai le oai hi. Dam ngawl vangui, tha nei ngawl vangui in ki pai thei ngawl, na ki seam thei ngawl hi. Nuntaakna thak ih nei ciang, thathak ih nei ciang bek in na ki seam thei pheang hi. Jesus in tuapa nuntaakna thak pia hi. Tua ni sia Sabath ni hi aa, Jewte in tua pasal pa mun ah banghang na puanlom pua ni ziam ci in maw pusak uh hi. Ahihang Jesus in cidam ngawl sia damsak aa, lam pai a sawl lel hi.

A thupi bel sia suatakna ih nga tu, ngupna ih nga tu ahi hi.

(Zom lai tu)

Kippau

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 46,726 phazo

A LUITE SIM/EN KIK TAWNG

Advertisements