Articles (Sizang Lai)

Pianna Pa Le Tawntung Pa

THU PAT NA
Kumsim June tha nipi thumna sia “PA” ni ci in kiciamte aa PAte zataakna ih pia bul hi. Pathian in leitung vannuai a bit phua zawk ciang avawtsa leitung vannuai a keam tu le ama taang leitung a uk tu in mihing PA Adam ana vawt masa hi. Adam PA bek suak thei ngawl hi ci in akop pui tu in numei Eve zong nana vawt hi. Amate in Leitung vannuai a kep tu le a pung tu in a vawt a nahi hi(Piancil 1:28). Tuahikom tu tha 17 ni hong theng tu PA NI muana in hi laingual kong at hi.

PA
Leitung ah mihing aminpiang PA nei ngawl ih om bua hi. “PA” ih nei hang in apiang te vive ih hi hi. Ahitazong ‘PA taktaai’ ih om bang ma ‘ PA ngina ngawl zong kitam pheivei hi. Tuaahile PA tataak ih ci te koi bang te ziam ci ih heak natu in mikaang te in PA (FATHER) a ci laimal 6 taw ih en kaak tu hi.

F—Faithful Friends ” Amuan tham man ngualtam”
A—Authoritative Adviser ” Avaang nei ngaisut na pia pa”
T—Trustful Teacher “Up tham man Sya pa”
H—Honorable Hero ” A zataak huai ngalhang pa”
E—Energetic Educator ” Thahat pil na hong pia pa”
R—Religious Ruler ” Upna lamlak pa”

Tate zong in ih pa tetek sia hi atung a thu nam luk taw kicing hi ci in ih mu thei tu kisam aa, tasia bangma in PAte zong in hi atung ah thuluk taw ih kicin tu akisam thu ahi hi. PA ahi pheang tu te zong in ni khat ni PA ih hi ciang hi atung ah thu nam luk taw ih kicin thei natu hanciam tu ahi hi. Tua hu in Paul in Christ ii pawlpi tung ah thu anei bangma PASAL zong in zite tung ah thu nei tu hong cina ahi hi(Ephet 5:23). Amasa thu nga teng sia son thiang kul ngawl tu ngaisun tawng ii a thu luk na sia kikup tu in kong teal hi.

Nupite kikhopna khat ah ka kihel tha ngei aa, a thu kikup khat sia LTT sung Pasalte zakta tu hong ci sia Pathian thu ah hong lampui thei ngawl te zong zakta tu hiziam ci thu ahi hi. A phi asua dong ngai man ngawl ka hihang keima khuaingip sial bawlna pan Upna kibang ngawl te taw na teang heak vun LTT sung a ci sia zui tu hi ka sa hi (2 Corinthte 6:14). Upna kikim ngawl Pasal nei te sia a Pasal ahina taw zataakna tu taciang om tu ahitazong, thu lukna upna lam lak pa hi ngei ngawl tu hi. Thu um PA khat in ih innkuan sung Pathian thu taw ih lampui/ih nuntaak pui tu sia tu ni thupi sak tawng. LTT sung ah PAte sia bangkua khat sung ah thiampi pa ih hi sia ma-ngil bua tawng. Tua bang in na zi na tate nalampui zo bua ah hell sung natheng sak le nikhat ni ciang Pathian na, na zi na tate thi san man hong siik tu sia phawk tek tawng. Thu um ngawl Pasal nei te zong in Satan ten pupui na hi thak tu sia kidop huai mama hi.

PA NI
PA NI a om ma in NU NI om masa hi. 1900 kum ciang US ngam Spokane khua mi Mr William Jackson Smart ih a tanu John Bruce Dodd a ci sia nu in 1900 kum ah aphot ni pan PA NI hong piang ahi hi. A nu sia thi pal ahikom apa ih apa vaipuak bek hi ngawl, anu vaipuak taw apuak khop a mu te PA manphatna phawk in aphot ahi hi. Tu kum sia PA NI a om zawk kum 102 a cin kum zong ahi hi. Tuaahikom tate zong in PA ih thupi sak ih zataak tu akul bang ma PAte in zong PA kician leitung thu Pathian thu taw bangkua lampui zo te khat tek ih hi natu kong hanthawn nuam hi.

PATE ZATAAK NA
Ei Zomite sia Pate azakta Pate a thupi sak minamte ih hikom thupi mama/lungdam huai mama ka sa hi. Ahitazong khua hong ngei vaial a, tu hun ciang PAte a awlmawk nawn ngawl zong kitam mama zo hi. Tu hun laitak seseam sia ih kawl ngam bang hun haksat laitak ahikom ih ngam pan kumpi naseamte ahizong sumvawtte ahizong ih innkuanpuite sia thi le naan ah kivaak, lung nuntaak bang in ih nuntaak tek sia ih heaksa ahi hi. Pawl khat te na ngual bang aneak zawk ngawl ciang, ngual sil bang asil zawk ngawl ciang ahang kan nawn ngawl in PAte mawna veu in tuat aa buaina tam mama piang hi. Khua phatak ngaisun thei hileang ih PAte sia khuangaihuai sa ah ih zataak seseam tu ahi zaw hi.

Hi sung san ah keima sia Pathian thupha ka saanna khat ahi PA ka nei lai sia hang in Pathian minthang ka pok hi. Ka PA sia tu June tha sung in kum 88 a cin kum zong ahi hi. Ka nu le ka PA in ta 11 hong nei zawk ciang ka nu na hong nusia aa, ka nu kik taw ta 7 hong nei thua hi. Ahihang a tate khat sim in pilna ahi theiza in hong nguan aa, thu hong nget sak thupha hong piak sia ka lungdam belna ahihi. Keima zong Pa hi bek ngawl aa, pu ( tupa ni nei) hi zo, a katapa zong PA khat ahina te zong Pathian tung ka lungdamna lian bel khat ahi hi.

2009 kum ciangin MBC pan ka kum cin hu in ka tawlnga aa, 2010 January tha in MBC te in Tedim ih khuapi pan PATOAIna hong pia hi. Tua laitak mealheakte ka saang ka puite khat in Kippau awng ,”nang Pathian thupha saang mama ni hi. PA thu hong nget sak/ thupha hong pia PA na nei hu in Topa na hong lamto hi. Kei bang ka no lai pan pa nei nawn ngawl aa, tu ni dong ciang hamsatna tuatuam ka nei hi” hong ci ciang ka PA ii manphatna ka phawk seseam aa, hi laingual taw ka pa zattakna ka piakna zong ahi hi.

THU KHUP NA
Mihingte sia hong hing leitung pa ih nei bangma tawntung nuntaakna hong pia TAWNTUNG PA ih nei siama ih hamphat lianbelna ahi hi. Topa Jesus in mi maw ih hina pan in tawntung nuntaakna ih ngai thei natu eite taang in hong thina sia ih up/ih san hu in ei zong TAWNTUNG PA ih nei hi. Ih pianna PA a om nawn ngawl hang nisim hunsim ah ih naibel ah a om ih TAWNTUNG PA hang in ki suangtaak tek tawng.

Hi lai a sim theampo in TAWNTUNG PA nei aa thin uam tak ih om tek natu le, Pate a zakta Tate khat sim ih hi thei natu TOPA na thupha hong pia tek tahen.

Kipthianpau

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 46,699 phazo

A LUITE SIM/EN KIK TAWNG

Advertisements