Articles (Sizang Lai)

Laithiangtho Pathian Kammal

Thupat na
Tha sim in nipini thupi mama pawlkhat om aa, ei thu um mite in tua nipini sia special sunday ci in la le thu taw Pathian minthang ih pok bul hi. December tha ahi le Jesus sua tha, January tha a hi le kum thak, March or July sung ah Jesus thaw kik ni,May le June sia nu ni, pa ni ci bang ah ih zak sung pan August tha ni pi thum na sia Laithiangtho nipini ci bang in ih ciamte hi. Tua hi aa tu tha August tha LTT nipini thupi sak na taw hi laingual kong at hi.

LTT pian na thu
LTT thu kikum tu ih hi kom LTT pian na thu ma ihsuut masa tu hi.LTT sia Pathian mizak 40 ih a aat tek uh hi aa, a ki at masabel Piancil le a khak be Thupulaak na sia kum 1600 bang kihal hi. Moses hun BC 1500 pan a ki pat a khak bel AD 95 kilaklaw sungteng ah a ki at ahi hi.

Hi LTT a at Pathian mi zak 40 te ii a at hun le ki bang ngawl, a at na mun le ki bang ngawl, a kikum ah a at khat zong om ngawl hi na pi, a tup na bulpi sia kibang siat hi. Hi LTT bu 66 ih a tup na bulpi sia thu thum ahi hi. Khat na ah Pathian tapa Jesus hong sua na tu thu, nina ah Tapa Topa Jesus letung mimawte hong tan tu ah hong sua na thu , thina in len zo ngawl ah hong thaw kik na thu le, thum na ah ih Topa Jesus sia nikhat ni ciang hi leitung ah hong tuak kik tu ahi na thu te ahi hi.

Tua bek dom ngawl LTT a ki aat theampo sia Pathian THATHIANGTHO (TTT) sawl na bang ah aki aat vive ahi hi(Timothy nina 3:16). LTT sia thumann thutak hil na tu, mihing te in ih maw na ihkhial na te ih pulaak ah mawmaai/khialmaai na ih nget thei na tu, ih mawna ih khial na te pan kisiik kik ah thuman lampi ih tot thei na tu, a mann lampi tung tawn ah ngual ih et te taak ih hi thei na tu ahi hun lam Paul in na thiang son hi. Lam khat pan LTT bu sia Pathian in leitung mite tung ah ama hi na aphuan na a ki tep te na zong ahi hi.

Thuciam lui le Thuciam thak
Thuciam lui sia bu 39 om aa, Pathian ii leitung a bitphua na pan kipan Topa Jesus sua ma sia hun sung teng a ki tep te na thu ahi hi. Thuciam thak sia bu 27 a kingawm hi aa Jesus sua na thu a thi na thu le,a thi zawk ciang thu piang lai tu te akiphuan khol na thu te ahi hi. Thuciam lui pan ah kamsaang te ii mukhol na te (Jesus hong sua na tu thu, a thi na tu thu, a thawkik na tu thu te) Thuciam thak sung ah kicing siat hi. A zezen in na Topa Jesus sia leitung ah mimawte hong tan tu hong suak ngawl. thi ngawl, thokik ngawl hi zen thong le Thuciam lui sia khiak na nei ngawl, kiman na nei ngawk hong suak tu hi. Thuciam thak zong a om na tu thu khat zong om ngawl hi. TUA A HI KOM JESUS SIA EI MIMAW TE A TU AH LEITUNG HONG TUAK SUK SIA LAITHIANGTHO BUBUP IH THU LAINGIL AHI HI.

LTT sung ah 30 percent sia kamsan na thu vive ahi hi. Kamsan na thu thu 4000 a om na sung pan kamsan na 3000 bang sia leitung ah piang siat zo/ tung siat zo hi ci in LTT thiam/kan te in son hi. Topa Jesus pai kik na tu thu kamsan na 330 vei bang aom sung pan a thu om te tetti om siat zo aa kicing siat zo hi ci in LTT thiam te in mu uh hi.

LAITHIANTHO Pathian kammal
LTT sia leitungbup ah laibu om theampo sung pan tambel aa aki aat, a kikhawng bel laibu ahi hi. Leitung kam tam bel taw a kiphen ah a kivawt LTT bu ahi hi. Leitungbup ah suakta tak ah aki vawt aki zuak ngawl na ngam aom kawm pan kikhen vaial kikhawng vaial LTT bu ahi hi(Note: Ei kawl ngam bang zong LTT bu theampo phial ngamdang pan kikhen aa, kawlngam sung hong tum tu zong sia vankham khat bang ah akikhaam ngam ihhi hi).

A bo ngei ngawl PATIAN KAMMAL
Leitungbup ah akikheal ngawl khat zong om ngawl aa, akip akho khat zong om ngawl hi. Nidang lai ngam minthang bel te zong aminthang suak om ngawl hi. Ta bang ma in khuapi minthang te zong aminthang suak om ngawl hi. Ih om na leitung pi mama zong kip tawntung tu hi ci in kua ma in aamakhan thei ngawl hi. Tu hun lai tak ngam khangtobel ahi America ngam, Japan ngam te zong zinlingte, huipi suangval te khaam zo ngawl hi. LTT sung ah kamsan na te sonkhol na te zong kicing vaial zo hi. LTT sung ah sonkhol na te 98 percent bang kicing zo hi ci ah LTT thiamte in mu uh hi. Hi bang hun khak bel sung ih thet lai tak ei leitung mihing te in Pathian kammak LTT in nun taak pui tu thu pi mama hi.Leitung vantung keak a bo zong Pathian kammal bo ngei ngaw tu hi(Isiazah 40:8).

Tu ni LTT bu sim in ih nuntaak pui tek na ziam? LTT in ih ngamtat na tu theampo hong hil na Pathian kammal LTT bu ih sim tek na ziam?

LTT kammal sia nipi khat ah khat vei Pulpit tung pan thuhil ih ngai sia taw kicing ngawl hi.( Tu hun ciang nipi khat khat vei Pathian kammal ngai ngawl akikhawm ngawl zong ih tam pheivei zo hi). Pathian humop Pathian TTT sawl na taw ki at ahi bang ma ihsim ciang zong dei na tatak thunget na, PathianTTT sam ah sim tu kisam hi. LTT bu nei bek sia taw ih lungkim le zong suak thei ngawl hi. Bang hang ziam ci le Pathian kammal LTT in ihngam tat na tu lam hong lak na Pathian TTT in hong tel sak hi. Ei thu um mi te a tu in LTT sia ih mei vaak lam hong lak pa ahi tu ki sam hi(Pslm 119:105).

Pathian TTT lam lak na taw na sim zawk ciang LTT sung om bang na ngam ta le na lampi tang tu aa, na mainawt tu hi. Thu hak sa mama na phul tha hial zong zaw na hong pia tu hi. Hebia 4:12 sung ah LTT sia a lang ni ahiam namsau saang in hiam zaw hi na ci hi. Ephet 6:17 sung ah”Pathian kammal sia Thaa ih hong piak namsau bangin na zangh vun” na ci hi.

Thu khup na
Hun khat lai in Senngam(China) ngam ah missionary pa khat a mai ah Palik te pai ah ama man ta ah puak LTT bu sut tu ci he ahikom a puak LTT dal khat leam in a kam sung ah phual man hi. Thongsung athet ciang tua dal khat bek anei LTT dal sia sisim ahi le thin kiam ngei ngawl in tha nga vaial hi.Topa minthang pok tawntung thei hi.

Topa kammal LTT sim tawng.Pathian kammal LTT nuntaak pui tawng. Pathian ahe ngawl lai te LTT kammal hawm sawn tawng.

Hi lai asim theampo Pathian thuthuk mu thei ng thupha/ cidam na thu pha/thinop na thupha hong pia tek ta hen.

Kip Thian Pau

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 46,726 phazo

A LUITE SIM/EN KIK TAWNG

Advertisements