Articles (Sizang Lai)

Kumthak le Lungdamna

lamcinthangBy Rev. Dr Lam Cin Thang

Lungdamna le thinnopna [Joy and Peace] sia leitung mihing theampo ii a dei bel thu hi. Pawl khatte in , hi thute nii atu in, biakna hanciamna, sum le paai le hauna, min le za letna, ngui thei khamthei le nu le pa paktatna taw in zong hon uh hi. Ahizong, lungdamna le thinnop maan tatak nga zongawl a, akhak bel bel ciang, natna, zawnna le thina taw hong kizom to hi. Tua hia,Pathian kungpan hong pai Lungdamna le thinnopna bekma a tatak ahina ih en tu hi.

A. Pathian ii Hong Vawtsak Lungdamna
Lungdamvawt masabel zan in vantung lalangte in, tuucingte zaak tu in “Leitungah thinnopna om ta hen” ci-in Lungdamvawt laasa uh hi. Hi thinnopna sia leitung mite piak bang hi ngawl a, tawn tung atu akip thinnopna hi. Hi Pathian kungpan hong pai Lungdamvawt sia bangbangin nga thei tu hi ziam?

(1) Thina Pan Nuntakna Sungah Theng Zo: “Passed from Death to Life” Adam hangin mihing theampo thi ahihang, Topa Jesu Christ a up hun aa kipan nuntakna sungah theng lian hi. Topa Jesu hong paikik ciang, “Thina awng, na ngalzawna le na ngu: koi sungah om ziam?” ci-in thina a thato ngamte kisuak hi.Topa Jesu leitungah hong paina sia thina akitak man in a khan tawntung sila in a om mihingte hong suakta sak ahikom kilungdam mama hi. (John 5:24, 1Cor. 15:22, 15:55-56, Heb. 2:15)

(2) Satan Ta Panin Pathian Ta Kisuak Zo: “ Satan’s Child to God’s Child ” Ih nu ngil sungah hong paai hun a kipan Satan tate ih himan in PT ii thin ukna a thuakte ih hi hi. Pianthakna cisia ngamtat pha khawng taw akinga thei vazeang hi ngawl a, suana pianna taw bek kinga thei hi. Topa Jesu hong tatna ih muanna tung tawnin, niivei suana taw PT taza kinga hi. Ih dinmun kikhealna hi a, PT ta suakte bekma vantung ngam a kitheng tu ahikom kilungdam hi. (Ps. 51:5, John 8:44, Eph. 2:3, John 1:12, 3:3-7)

(3) Mawneite pan Mithiangthote Kisuak Zo: “Sinner to Saint” Mawnei khatin na pha bangzapo a sep bel hang, PT mai ah puansia niin [numeite niindalna]taw kibang vave hi. Akihuai mama tangteal le thanh taw hong kitengat hi. Topa Jesu a saan hun ciang, tua mawneipa sia, PT mai ah, a thiangtho, paubang ngawl, vun tun ngawlin, kimu zen hi. Hisia, dinmun thianthona kici a, mithiangtho sazian sungah hong kikoi ahikom lungdam ngawlin ki om thei ngawl hi. (Isai. 64:6, Job 25:5-6, Eph. 5:26-27, 1:1)

(4) Mawna Thong Sungpan Kisuakta Zo: “Freedom from Prison” Ih pianna Pu Adam sia thunit ngawlna thong sungah kikhum ahikom, eite theampo zong thong sungah a kipiang hi nginge hi. Mihing theampo thong kitak ahikom, aamahkhan kuama kipia thei ngawl hi. Mawnei ngawl Topa Jesu bekma in aamahkhan hong pia thei hi. Ih vekpi in mawna sila kihi a, Tapa ii hong suatak sak ciang, asuakta takpite kihi pheang hi. Na suatak hunlam na he nale na lungdam kul hi. (Rom. 11:32, Gal. 3:22, John 8:34,36)

(5) Mawna Leibate Hong Losak Zo: “Debts were fully Paid” Ih nu sungpan ih pian ni aa kipan, aa kipan, ih thi ni dongin, mawna leiba nisim kibelap tawntung hi. Ih ngamtatna, kampauna le ngaisutnate Pathian teptena laibu sungah kikhum hi. Leitungmi mawna leiba alo zo khat zong ki om ngawl hi. Topa Jesu in thinglamte tungpan ih mawna leiba theampo hong lo sak zok ciang, “Kilo[man]siat zo hi,” [consummatumest] ci-in zawna taw au cileang lungdam ngawl tu hiziam? (Col. 2:14, Luk. 7:42, John 19:30)

(6) Tomlawna Pan Hong Kitan Zo: “Redeemed from Curse”Adam mawna hang le pu le pa maw na hang ahizong, thukham zui lakna hang ahizong, tomlawna kithuak hi kale, Topa Jesu a saang takpi khat sia, tua tomlawna pan hong kitan zo hi. Nu le pa ii sapit nga thuk aneak hu in tate hakhim ngawl tu hi. Piangthaksate ngangawn Topa Jesu hangin tomlawna pan ih suatakna mangil in patau thei hi. Topa Jesu ii zawsiatsa tungah ading khatin lungdamko nanak zaw tu hi. (Gal. 3:10-13, Jer. 31:29-30)

(7) Leivui Sungpan Hong Laamto Zo: “We Are Lifted On High” Leivui taw hong vawt mihing khat sia, mawna kisik a, mawmaina anga zokciang, PT ta suak bek ngawlin, Christ ii ambassador, thukhenmaang, thiampi le kumpi za hong kipia zenthong hi. Biakna dangte ah bang zapo a hanciam hang, PT ta sua theina thu nga thei ngei ngawl hi. Leitungah bangzapo niam kaleang, PT in za lian bel hongpia ahiciang lungdam ngawl tu hi ziam? (Luk. 24:47, 2Cor. 5:20, 1Cor. 6:2-3, Tpl. 1:6)

B. Mihingte Vawt Thei Lungdamna
Hi atung aa, Pathian Tapa Jesu ii sepnate muang aa, asaang khat in, mihingte tel zok ngawl thinnopna [lungdamna] nga hi. Jerusalem khua lalsa a pua kik Nehemiah ii, “Topa sung lungdam na in ka tha hatna hi,” a ci bangma, lungdamna maan sia Topa sung bek ah om hi. Ahizong piang thaksa khat sia, ama ii Pathian taw akizopna tung tawnin lungdamna ih nga zia khat le khat kikim ngawl hi.

(1) Piakna: “Givings” Topa Jesu in, “Ngana sangin piakna ah thupha tam zaw hi,” aci bangma, angate sangin apiate lungdam zaw lai hi. Ka zi masa hong nusiat zokciang, pawlpimite hon khatin neak le dawn tatuam hongpuak tawntung uh a, kei zong aa:na ka hikom, hong puak nawn heak vun ka cile,“Hibang ciang zong hong hisak thei ngawl tuni?” hong ci ngei hi. “Noma tungah hong kivawt tu na oai uh bangma, ngual tungah na vawt ta vun,” Topa in ci hi. Apiate lungdam hi. (St. 20:35, Matt. 7:12)

(2) Maisakna: “Forgiveness” Topa thungetna sungah, “ Ko tungah hong khialte ka maisak uh bangma kote khialna zong hong maisak ta in.. cisia, KJV Lai Thiangtho sungah, “Ngual leiba ka mai sak uh bangma ko leiba zong hong maisak ta in, ” ci hi. Hong khialte, lei hong bate ciamte [khit] leang, vanngit kenkon mama hi. Kei zong lei hong kiba K.32 lakh [thein] sia tukum ka mai sak ciang, ka vanzaang paih liplep a, ka lungdamna hong khang hi. (Matt. 6:12, Eph. 4:32)

(3) Lungdamkona: “Thankgiving” Sawltak Paul in “Na theampo sungah lungdamkona na zangh vun,” ci hi. Ih cidam ciang, ih cithei ciang bek hi ngawl a, ih cinat ciang, ih cimawk ciang zong lungdamko theite sia mihing lungdamte hi. Paul le Silas te sia Philippi thong sungah kol le khau taw akiheen laitak ngangawn Pathian pokna lasa in lungdam hi. Kiim le paam thupiang te en ngawl a, tungsang en in, lungdam ako theite ih hi tu thupi hi. (1 Thess. 5:18, St. 16:25)

(4) Kiniamkhiakna “Humility” Lai Thiangtho in, “Pathian in a kiphasakte nalh a, a kiniam khiak te maipha pia hi,” ci hi. A kiphasakte sia tona nuam tung to keen a, a kiniamkhiakte sia, lei ah to hi. Topa cina ah atungah na to uh ciang a kilawm zaw khat hong pai ciang ot kul a, lei ah to lete, a tungah hong to tan hong ci tu sia pha zaw hi ci. Atung aa to akiphasakte khuangai tu a, anuai aa to aniamkhiakte lungdam tu hi. A kiniamkhiak takpite bekma na theampo ah lungdam thei hi. (1 Peter 5:5)

(5) Jesu’ Thu Sonna: “Preach Christ” Paul hunlai, pawl khatte in Christ thu sia thin pha taw hil ngawl ahihang, Christ thu kihil pole, ka lungdam vave hi Paul in ci hi. Jesu thu hilna sia, vaipuak le hamphatna [responsibility and privilege] hi. Jesu thuhilna hangin mawnei khat hong kikheal le leitung bup taw akilei zo ngawl thaa khat kinga a, a kikheal sia pa/nu bek lungdam ngawlin, a sonpui sia lungdam kaan lai hi. Pathian le vantung lalangte zong lungdam hi. (Phil. 1:17-18; Mk. 8:36-37; Lk. 15:7,10)

(6) Itna: “ Love ” Pathian sia ki-itna hi a, tua ki-itna sia, Thaa Thiangtho in eite sungah hong khum hi. Ki-itna sia, ih sungah om kale, ih it-na taw kizui in kilungdam hi. Ngual hong it tu ih hanciam ciang, thinkiam thin-ukna bek piang a, eima itna tha leang ih lungdamna hong khang hi. Ngual ii hong it tu sia ei vawt thei hi mama ngawl a, eima sangpan itna kivawt thei hi. Ih lawm le ngual bek it tu ci ngawl a, ngalte ngangawn ih it ciang lungdamna acing kinga pheang hi. (Rm. 5:5, Matt. 22:39, Rm. 12:20)

(7) Mihing Muan Sangin TOPA Muanna: “Trust in God than in Man” Psalm laa atpa in mihing muan sangin TOPA muanna in pha zaw hi,” ci hi. A thi thei mihing asuangte kipuavawk tu a, senneal kongaw ngam ah apo sawlpaang kung taw kibang ahikom, lungdam ngawl tu hi. TOPA amuangte sia luihui ah a po thingkung bang hi a, ateete hing tan, khuakhal zong poimaw sa ngawlin lungdam tawntung hi. Kiim le paam taw akisai ngawl thupha pan hongpai lungdamna hi. (Ps. 118:8, Jer. 17:5-8)

Thukhupna: Topa kungpan hong pai lungdamna sia, mihingte kipiak thei hi ngawl a, ih dawl thiam le thiam ngawl taw kisai in, lungdamna zong khat le khat kilamdang hi. Lungdamna maan tatak ii a zungle a ziikpi sia Topa Jesu sepna tung tawnin a thongin hong kipia ngupna hi. Paul bang sia, Rome khuapi ah a thongtak in, ngimna le vawtsiatna a thuak sung, Philippi pawlpite a laithakna ah, “A tawntung inlungdam vun, Kong ci kikik hi. Na lungdam ta vun!” ci hi. Leitungah bangzapo ngimna thuak kaleang,Topa hong ngupna thupha le vantung pan hong kilak pheang tu min thannate ih ngaisut ciang, tuni ih thuak ngimnate taw tengat thei tu hi ngawl hi. TOPA itna le phatna tungah kinga in a tawntungin lungdam tawng. (Phil. 4:4, Rom. 8:18)

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 47,193 phazo

A LUITE SIM/EN KIK TAWNG

Advertisements