Articles (Sizang Lai)

Khat le Khat Na Ki It Vun (John 13:34, 35)

LAWMTA KI ITNA
Kumsim February 14ni Valentine’s Day kivawt hi. ‘Lovers’ Day-Aki-itte Ni’ ahibale ‘Lawmtate Ni’ kici hi. “USA ah 2011kum Lawmtate Ni in ankuang-umkhopna $3,400 ‘awn-million’; ‘jewelry’ kici khi, zungbu le kizepna tuatuam $3,500 million; paak $1,700 million le cards $1,100 million man zangh in ki-itna kilak hi. 2012kum in 8.5% atamzaw kipia a, mihing khat ciang $126 bang bo hi. 2013kum in 2012 sang $5000 million atamzaw kizangh tu kilamen hi” BIG Research sponsored by National Retail Federation, an article in US Today.

Valentine ‘tangthu-legend’ tam ma ma a om sungpan, ahawihbel kong hawm nuam hi. AD 270 lai Rome khuapi ah Valentine kici ‘pastor-thiampi’ khat om hi. Kumpi ngilo ma ma Claudius II in Roman Empire uk a, Rome khuapi ah mang hi. Khansia lei lawlawm ahiciang “Cruel Claudius” kici hi. Claudius in ngamhuukdan puapha nuam a kinei in ngalkapte zinei tu nga-ngawn khaam hi. “Zinei tanei ngalkapte hat ngawl, ngina ngawl hi,” ci hi. Tua kawmpan thiampi Valentine in lawmtate kitenna vawtku sak ni-thii hi. Valentine kiman ahihang Claudius kumpipa in Valentine paakta veve a, “Ka biakna ‘Lawki-Paganism’ nong zui le, suakta sak tu khi!,” ci hi. Valentine in, “Nangma, Christian hong suak zaw ka ve,” ci bungle thong ahiciang kithat hi.

Thongukpa Asterious ii mit khuamu ngawl tanu Julia dam sak a, TOPA Jesus a um thongukpa’ innkuanbup sila innteang taw mihing 44 Valentine in tuiphum hi. Ki-it ahiciang thongsungah Julia haw ngei hi. Thidaan a kipiak tu February 14ni in Julia lai khat thak a, ‘Na Valentine Kungpan-From your Valentine’ ci in minthu se hi. TOPA ii hong itna phaw-na le TOPA tung thumanna lakna tu ngaisutna in ama khutma taw ‘parchment-savun laidal’ tungah asuai lungtang lim Valentine in hawmkhia si hi. Tasia pan kipan lungtang lim ii mu ciang ‘love-it’ ci-in ii tel hi. Tabangin Valentine’s Day hong piang a, Pope Gelasius in AD 496 ciang kipsak hi. AD 1492 ciang USA kumpi in ‘zumkhakni-holiday’ suak sak hi. Valentine se “romantic love – ci-le-sa ki-it-na” lim ahihang patangte in zong “Will you be my Valentine-Ka lawm nong hi ba tuam?” ci thei hi. Christmas card zom Valentine card tambel a, card theampo ii 25% ahi hi. Valentine’s Day card theampo ii 40% se pate nute ii tate apiak le tate atu alei sak ahi hi.

A 2NA TAW LUNGKIM KI-ITNA
Goliath tungah ngualzawna anga zawkciang David kumpi-inn theng hi. Saul kumpipa in David eang a, kumpipa tapa Jonathan in ama pumpi za in it hi. “Jesse tapa nuntak laiteng nang mihing suak ba te,” apa Saul in a cici kawmpan Jonathan in kumpipa tapa ahi na lim – kawngkhau, puan le puantungsilh ama pum tungpan sua in, David zepna in nei hi. Ama toai thal le namsau toai sak a, kumpi-tapa ahi-na za-pia suak hi. Saul ii thaasawm ciang David ngaltaina ah Jonathan pai in, “Nang kumpi na suak tu a, kei nangma zomh a 2na in kong om tu hi,” ci in thapia hi. David le Jonathan kumpi sep khop tu ii munop kawm pan Jonathan ngalsungah hong thi thong ta hi. “Jonathan, numei le pa ki-itna sang zong nong itna lianzaw in hong thuthiam ka na ve te,” ci in kap hi. Kumpi a sua ciang, Jonathan tapa apeangbaai Mephiboseth zong in, kumpi sabuai ah nisim David in ankuang um pui hi. Jonathan se TOPA Jesus lim ahi hi. (1Samuel 18,20, 2Samuel 1, 9).

THUKHAM 11NA
Christian pastor khat tuipitung khualhaw hi. Teambaw tuasia a, sungten bek taw suakta hi. Zan khuazing bikbek kawm pan tuipi-hui ah meitaang thil-thial inn khat a mu ciang zuan hi. Innpua pan, “Kei pastor khat khi! Teambaw tuasia a, pumnguak-phial hong suakta khi! Tu zan na innhul nong bealsak zo tuam?” ci hi. Innsung pan innteakpa in, “Kei zong pastor khi! Thukham nam bangza om zia?” a ci le, atuasia pa in, “Nam 11” ci hi. Innteakpa in, “Nang mi ngilo! Kei inn hon ngam bong ngei! Thukham nam 10 bek om zei!,” ci hi. Dongtawkpa in, “Nangma thukham khat mangilh hi tu ni! TOPA Jesus in, ‘Thukham thak khat kong pia hi: Note kong it bang, note khat le khat na ki it vun,’ hong ci na po zei!” ci hi (John 13:34). TOPA in tua thukham thak hong mangilh sak heak ta hen!

UNAU KIDEI SAKNA
Unau nii om hi. A naupa zi taw ta taw kop a, a upa tangvalhaam hi. A upa in, “Ka naupa se avak ata tu zi le ta nei a, khuangai huai hi,” ci in ngaisun hi. A naupa in, “Kei se zi le ta taw om a, ka upa se ama nguak patol hi thong a, khuangai huai ve,” ci in ngaisun hi. A unau in aki-ngii-zawng lo tho uh hi. Anlak hun hi a, an ki-at zo ahihang anvawngte losungah khop ngawlin om lai hi. Zan khuaziin ciang a upa in ama anvawngte a naupa losungah nawnku hi. A naupa in zong, “Ka anvawngte ka upa losungah nawnku leng ka upa in, ‘Ka Pathian in thupha hong pia ci in ngaisun tu ve aw,” ci in ama anvawngte a upa lo sungah hong naw-nawn hi. Tua-le, a unau in anvawng pua bembom in longi ah hong ki talsik uh a, anvawngte khia in hong kipumkoai ta uh hi. Kum tampi zawk ciang tua munah Solomon Biakinn hong po hi. Solomon min zong ‘peace-kilemna’ ahi hi. Eima atu sangin ii u ii nau atu dei-sak zawkna se ki-itna takpi ahi hi.

KHAT LE KHAT NA KI IT VUN!
Nungzui 12 sung pan John moi bel hi. ‘ TOPA itpa John – John, the Beloved’ kici hi. TOPA Jesus a it bel pa zong ahi hi. TOPA Jesus huihtat dong thinglamte nuai-ah a ompui ngam nungzui ama bek hi. Ngual taw kizopna thiam a, thiampi inn ah Peter a tum thei ngawl ciang tum sak thei hi. Nungzui theampo kithat hi. John zong ngutui kituul kale thi ngawl, sathau sa taw kikang kale thi ngawl ahikom Patmos tuikulh ah hawlkhiak thuak hi. Patmos pan suataak kik ciang Ephesus pawlpi keam hi. Huai ma ma zo ahiciang Nipi sim thuhilh tu Pastor John taal taw hong kipua a, biakinn palen ah kito sak hi. Tokawm in thuhilh a, “Note khat le khat na ki-it vun” ci hi. Nipi kik ciang zong tabang ma hilh hi. Nipi-sawn ciang zong “Note khat le khat na ki-it vun,” ma ci hi ci in kison hi. Ki-itna bebek bulphu hi ta na, ka um hi. A lai-at pawl khat en tawng!

  1. “Note khat le khat na ki-it vun” ci TOPA Jesus thuhilhna John bek in ciamte hi (John 13:34, 35). John laithakte en leang,
  2. “Note khat le khat na ki-it vun!” (1John 3:11, 23).
  3. “Khat le khat ki-it tawng!” (1John 4:7).
  4. “Pathian in hong it ma ma ahiciang khat le khat ii ki-it tu kilawm hi” (1John 4:11).
  5. “Khat le khat ki-it leang ii sungah Pathian hong teang tu hi,” ci hi (1John 4:12).

KI-ITNA MA THUPI BEL

  1. Sawltak Paul in, “Note khat le khat ki-it vun, a lawm angual a itpa in thukham zuipa ahi hi” “Tu in upna, lawpna, itna thu thum om hi. A thumte sungpan itna thu alianbel hi,” ci hi (Romans13:8; 1Corinthians 13:13).
  2. Peter in, “Ki-itna in mawna tampi seal hi,” “Khat le khat nasia tak ki-it vun,” ci hi (1Peter 4:9, 8).
  3. TOPA Jesus in, “Kei kong it bang note khat le khat ki-it leute, ‘Ka nungzui-Christian’ na hi uh hunlam mihingte in hong he tu hi,” hong ci hi (John 13:34,35).
  4. TOPA Jesus in “Kong thupiakna in Kong it bang note khat le khat na ki-it vun! Lawmte atu nuntakna piak sang alianzaw ki-itna a om bua hi,” ci hi (John 15:12, 13).
  5. John in, “Ei zong u le naute a tu nuntakna piak tu kilawm hi,” ci hi (1John 3:16).
  6. Ii ki-it le ii sungah Christ hong teang tu a, pawlpi, innkuan, be le phung sung hong nuam tu hi. Na ki-it pui thei ngawl a om le nuisan, maitai masa in! Maitai lete, hong maitai thuk tu hi. “A smile is a curve that set all things straight – Ki maitaina se a koai khat hi a, na theampo tang sak hi” Robert H Par.
  7. Ama hong it bang u le nau a it tu in TOPA in thupha hong pia ta hen! Amen.

Nu Lian Za Dim (Lianhuai Nu)

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 47,193 phazo

A LUITE SIM/EN KIK TAWNG

Advertisements