Articles, Articles (Sizang Lai)

Sapna Sawlna (Calling, Sending)

sapna le sawlnaBy Thuantak Tulpipa

Sizang ih pu ih pa te in Doai na bia a, bia thathong ngawlin, palai ahi Tulpi seam, hiampi seam ma na ha koi hi. Banghangziam cile seamkhial tha le a seam pa in thuak hi. Tua ahikom Tulpi seam tu sia kuama uuk ngawl hi. Tulpi a seam sia in a nuntakna taw theak a, Tulpi seam ahikom zu le sa (or) sum taw kithamh hi. Thapna piak ngawlin Tulpi kuama in seam zo ngawl hi.

Tuasia bangma Israel mite in Pathian a biak ciangin Thiampite ngawl taw bia ngam ngawl hi. Levi minamte in Palai Thiampi seam a, 1/10 taw thapna pia hi, Thiampite zongh seam khial thei ahikom Biakna a piak ciang a peang uh khau khi sa in Biakna mun thiangtho ah tum hi. Banghangziam ci le seam khial thei a, seam khial tha le thi thei hi tana a kaikeak natu khaukhi khol hi. Thiampi Aaron tapa te ahi Nadab le Abihu te in Pathian piak ahi ngawl mei vawt tawmin Biakna a piak sia Pathian thin uuk a, van pan mei khiasuh in kaanglumh sak hi. Lev 10:1-Thiampi Eli tapa teahi Hophni le Phinehas te zongh Thiampi sa a uuk bangpo a laak hu in Pathain in ngal sungah thisak hi. 1 Sam 2:12 Doai biakna ah Tulpi sep lau huai a, Pathian biakna ah zongh Thiampi sep sia lau huai hi. Tua hi tana Doai biak hun lai in Tulpipa a om bale Tuldom a seam tu sia peamta te ci bangin seamsak bek hi. Seam khial tha le a thi tu uh lau hi.

Topa Pathian in a naseam tu sia ama dei mi samin sawl hamtang hi. Israel te Egypt ngam pan a pusua pui tu in Moses samin sawl hi. Moses zongh in kei pauthiam bong ka aw tawn hi ci ahihang sawl veve hi. Ex 4:1- “Midian mite khut sung pan Isreal mite a honkhia tu in Pathian in Gideon samin sawl hi. Gideon zongh in kei sia Manaseh minam a zawngkhal bel te hi a, tua sungah ka Innkuan a zawngkhal seseam khu hi” ci in nial hi. Ahizong Topa Pathian in sawl veve hi. Jud 6:1- “Ninavui khua mite suatak natu in Pathian in Jonah sawl hi, Jonah zongh uuk ngawl a, taiku Nang ka sap a sep dadong sawl veve hi. Jonah 4:1- Kamsang liante kamsangno te theampo zongh Pa Pathian in mangmuna taw ahizong, a aw mama taw ahizong mangmat na taw ahizong samin sawl hi. Sapna, Paupuina, Sawlna om ngawl in ama uuk thu taw Thiampi seam, Kamsang seam om ngei ngawl hi. Leitungbup lungdamna thuson tu in Topa Jesus in a nungzui 12 te samin Kum 3 sung tintan pia.in sawlkhia hi. Tua ban ah Thu um sa mi (tuute) a keam, a cing tu sia ama a it mama Peter vaipuak pia hi. Peter tungah, Midangte ii hong it sangin nang nong it zaw ziam ci 3 vei a dok zawkciang, “Ka tuuno te na vaak in, ci pheang hi. John 21:15- Lungdamna thu a son tute a tealna le Pawlpi keam (Pastor) tu a tealna kibang ngawl hi. Tuucing tute ama it a, a tuunote a it tu te bek teal a hina kimu thei hi. Thaathangtho in Paul le Banabas te Lungdamna thu son tu in teal a, sawl khia hi. Na lamdang tam mama piang hi. Act 13:1- Israel jninamte a lampui, a keam Thiampi Eli zalaih tu a tapa te a nginat ngawl ciangin, Nupi Hanah ii thungetna taw Pathian naseam tu a aap Thiampi Samuel sia Pathian in kum tampi sung Israel mite keamin lampui sak hi. 1 Sam 11:11- Timothy sia a pu Lois le a nu Eunice te ii pattana hangin Pathian mi zak Pawlpi keam thiam suak hi. 2Tim.1:5- Israel mite a lampui Moses a laih tu sia Pathian in Moses tungtawn in Joshua teal hi. Kamsang Elisha sia Kamsang Elijah tungtawnin teal hi. Lai Thiangtho sung Pathian naseam te thu ih et ciangin Kumpi Innsung pan a khang, pilna nei Moses, Pharisee minam ahi pilna nei Paul cite nasepna sia a dangte taw kibang ngawl hi. Muibun sap ci in kimu hi. A sep khialna zongh tam la zaw hi. A thupiak bang a ni ngawl a naseamte sia dual: ngawl het hi. Abraham zongh Pathian lawm kici Mang hi. Ahizong Pathian in Abraham tungah na bee te le na ngam,. na pa nusia in kong lakna ngam ah paikhia in ci hi kasap Abraham in a paikhiat ciang Lot na zuisak hi. Tua thunit ngawl hu in a suan a paai Isreal minam te Egypt ngam ah Kum 400 sung sal a sep tu sonkhol paih hi. Pianciil. 12:1-4 David zongh Isreal mipha za a sim hu in Pathian in a mite tam mama thisak hi. A seam khialpa tatak sia in zongh thuak sak vateal ngawl a, a innkuanpui, a minamte in thuak sak thong hi. Leitung Kumpi naseamte zongh ama pan kipan a innkuanpui te dongin ki en cik hi. A seam khialte kikoi thong ngawl hi. Lai at no khat nga natu zongh, Pilna ih lak zawkciang thudokna tam ma taw ki ze-et a, a zote bek kiteal hi. Lai Thiangtho sung Pathian naseamte peuma Pathian sapna, Pathian sawlna om ngawlin amate uuk thu taw a seam om vet ngawl hi. Israel Kumpi a seam masa bel Saul Kumpipa sia a ngalsimhna ah a ngalte in neak mama zo ka sap Thiampi Samuel theng thei mama ngawl a, tua hu in ngakla in Thiampi a sep thaak hu in a Kumpi sepna pan Pathian in tawpsak hi. 1 Sam 13:1-14 Kumpi Azziah in Thiampi te thupi sim ngawlin Biakinatau ah biakna pia tu a din hu in phaak natna vei law hi, 2 Chr 26:19. Thukham hilh sya khat in Topa Jesus tungah na paina po kong zui tu hi a ciciangin Topa in, “Ngia te in kua nei hi” ci taw zoziau a, hong zui tan ci ngawl hi. Ama sap, ama sawl hi ngawl ahikom zuisak ngawl hi. Matt 8:20 Pathian sap, Pathian sawl ahi ngawl sepna lauhuai a hina hong mu sak, hi! Doai biakdan le Pathian biak dan sia tam kilamdang ngawl hi. Sep khial vawt khialna mun ah Doai zongh Pathian zongh in kuama dual ngawl hi.

Ih pu ih pa hun Doai biak hun sung Tulpi seam sia bee khat sung a khang kizui in seam susuh hi. Israel minam sungah zongh Levi minam bee le phung bek in Thiampi nasep seam hi. Thuciam lui sung Pathian Thiampi seam sia a khang zui in seam susuh a, Thuciam thak hun ciangin Thiampi nam om nawn ngawl hi. Jesus um a, nii vei suakikna a nga peuma Pathian Thiampi nam kihi siat hi. Pathian tungah Palai hong sepsak tu thiampi kisamh nawn ngawl hi. Thiampi puan kul nawn ngawl, Thiampi awmdaal kul nawn ngawl, Thiampi lukhu kul nawn ngawl, Pathian mai ah leitung kizepna bangma kisamh nawn ngawl hi. Ahizong Topa Jesus in a tuuno te a keam tu sia ama a it mama Peter bek teal in sawl hi. 1Tim 3 sungah pasal khat in Pawlpi keam a suak nuam le nasep pha khat sepnopna nei hi, ci hi. Ahizong tua pa sia:- Zi khat bek a nei hi tu hi.

Zu ne ngawl mi hi tu hi.
A cilngil mi hi tu hi.
Zirido a thiam mi hi tu hi.
Ngual a hilh thei te hi tu hi,

ci in cian takin ki at hi. Pawlpi keam ci thada Pawlpi Upa zongh sitbanna nei ngawlte teal tu hi kici hi. Pawlpi keam tu ci thada Pawlpi upa tu zongh kisinsak phot tu a, a zo le seam bek tu ci lai hi. Tuate ban ah sum bek a ngaisun te hi ngawl tu, etc ci bang thuthun tampi tak na om hi. Pawlpi keam sia thiampi hi ngawl a, Pawlpi a uk zongh hi ngawl hi. Pawlpi uk tu Jesus in sawl ngawl hi. Peter tungah 3 vei sitset, ka tuute na vaak in ci sawl hi. Ez 34:4- ih et ciang in,

Ka tuu zawngkhaalte na ou bua uh hi.
Ka tuu a cinate na ou na bawl bua uh hi.
Ka tuu a liamte a liamma na tuamsak bua uh hi.
Ka tuu lampialte na khiang bua uh hi. Ka tuu a bote na zong bua uh hi. ci Pathian kammal na ki at hi. Heb.13:17 pan ih sim ciangin “No hong keam na lampuite in khatvei ciangin Pathian tungah a nasepnate sazian lak tu hi kici hi.

Luke 10 ah “Lungdamna thu son te atu in Thuthun tampi om ngawl hi. Sumbawm, peangdap, keng thua heak vun. Lampi ah ngual taw thu tampipi son heak vun ci khawng hi lei hi. Tu hun Pathian na seam tu a kipia peuna Lungdamna thu son tu sangin Pawlpi keam tu tam kipia zaw hi hingh. Topa Jesus in nungzui 12 a nei sung pan khat bekma Pawlpi keam tu in sawl hi. A dang 11 teng sia lungdamna thu son tu in sawl hi. A ki leebu na a om bana tu ziam? Lungdamna thu son in paikhia leang ih zui tu thuthun tam ngawl zaw a, lungdamna thu sonte a na sepna Pathian tungah sazian lak tu ci zongh om ngawl hi.

Tua hi a, Pathian na ih sepna ah Pathian hong sapna tatak na za a, hong sawl bangin a seam hi ziam? Eima le eima ih ki piakna taw nasep pha teal a, Pathian na a seam hi ziam? Pathian aw za a, Pathian sawlna tatak ma a ni naseam ih hile na sepna hong puicing tu hi. A kipia tawm ih hile Pathian tuunote a keamte zui tu thuthun te ih zui ziam? Ih zui bale ih nasepna hong muibun ngawl tu hi. Pathian in a naseam tu a sawl te sungah Pilna nei, mi thupi te nasepna teng ma in muibun bel hi ci ih mu thei hi. Ih minam atu in Topa na sepna ah tute tate in na pilna uh sia.lejtung Kumpi nasepna po/in nong zak sangin Topa na sepna ah hong zangh zaw le uh the ih ci nuam vaheei hi. Thu um mi U le Nau te zongh in Laithiangtho sin papo Pawlpi keam tu in laak tu kaal ih ngalaak papaih sia ngaisut phot tu pha mama thong hi ngawl ziam? ih ci nuam vaheei si hi. Ih sawl sia Pathian sawl ma ahi tu ziam? Ih sap sia Pathian sap ma ahi tu ziam? Ih zak s|a Pathian zak ma ahi tu ziam? Pathian sap mi, Pathian sawl mite ihteal thiam, ih zak thiam thei natu in Topa Thaa in ih thaa mit hong hon sak tek tahen.

Heaktu: The Siyin Baptist Vol 58 sungpan

Related Post

need

Kong Tulmaw Tawntung hi

Lam 2

Banghang Mission Kiseam Ziam?

khaipau

Sumpi Taw Kisai Tetti Panna

kipthianpau

Pathian Pai Zia le Mihing Pai Zia

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 46,145 phazo

A LUITE SIM/EN KIK TAWNG

Advertisements