Articles, Articles (Sizang Lai)

Jesu Hong Hil Nundan Thiamna

KhaitualKihilhna sia kampau taw ahizong, laibu sungah a ki-at tatuamte taw ahizong kizangh thei hi. Bangpo hi zong, kihilhna theampo te sia siat natu hi ngawl a, phat natu, hoi natu, thinnop natu, lungdam natu, maipha nga natu, pil natu, ciim natu, khanto natu, cidam natu, thahat natu, khansau natu, hau natu, ci bang vive hi zaw hi. Ahizong mi tampite in diksa ngawl uh a, “Ka vakeen awng, ka vangi awng” ci zaw uh hi.

LTT kammal 2Leitung ah kihilhna tampi a nei thei, a zangh thei, a zui thei tampi om a, tuate ngam buppi zak mipil miciim suak uh hi. Leitung ah biakna lian nam Ii om a, tuate in Hindu, Muslim, Buddhism le Christian ahi hi. Tuate in laibu manpha mama a tatuamte nei uh hi. Leitung ah biakna kipawlna masabel in Hindu biakna hi a, amate in “Vedas” a kici kihilhna laibu pha mama khat nei uh hi. Amate biakna taw kisai in heak tu a kilawmte tepteena laibu “Rig Vedas” zongh nei uh hi. Biakna taw kisai ngaisutna tatuamte a kitepteena “Upnishad” laibute zongh nei uh hi. Amate pathian pokna labu “Bhagvad Gita” te zongh nei uh hi. Tuate tungtawnin kihilhna tatuamte nei uh hi.

Islam biakna in “Koran” ci laibu pha mama khat nei uh a, a manphabel in ngaisun uh hi. Tua sungah thute sim uh a, tua hilhna bangin ngamta uh hi.

Buddhism te in um in zui a, a nuntakpui laibu thupi mama khat om a, tua in “Tripitakas” laibu hi. Hi laibu sim in zui in ngamta uh a, tuabang a hanciam zo mihingte pathian suak thei ci liang uh hi.

Christian te in zongh midangte sangin phat zawk natu, nopsak zawk natu le a tawntung mun atu dongin tua sungah kiciamtee in om a, tuate theampo Pathian humop hi ci in tua Thubu sia “Lai Thiangtho” ci uh hi. Christian khat ii nisim nuntak natu dan teng tua Thubu sungah ki-at siat hi. Kihilhna thu tampi om a, Jesus hilhna thupi mama hi. Tua hilhna te sia nampi thum khen in kong at hi. Tuate sia –

(1) Christian khat ii Pathian tungah vawt tu thute,
(2) Christian khat ii midangte tungah vawt tu thute,
(3) Christian khat ii ama nei tu thute ahi hi.

Tua sung pan tutung in Christian khat ii Pathian tung a vawt tu thute kong at a, mai sang ah a dang 2 te ih zom kik lai tu hi.

(1) CHRISTIAN KHAT II PATHIAN TUNGAH VAWT TU THUTE Topa Pathian it in (Love Him)
Na Topa Pathian sia na thin theampo, na thaa theampo, na thahatna theampo le na ngaisutna theampo taw na it in. Pathian in hong it masa ahikom eite zongh in ama ih it hi. Topa a it ngawl theampo Jesus hong pai kik ciangin mawna thukhenna thuak tu hi. Topa Jesus a it tatak theampo te Pathian thuthiamna thupha saang tu hi. Pathian mu ngeingawl na hi uh hangin upna taw thaa ngupna na saang uh a, tua in na upna uh ii a tupna bulpi hi. (Lk. 10:27, Uohn 4:19, ICor.16:22, Eph.6:14, IPet.1:8-9).

(2) Topa Pathian kiita in (Fear Him)
Topa kiitakna in pilna, ciimna kipatna ii bulpi ahi hi. Leitung mihingte theampo in Topa sia kiita in zatakna nei tu hi. Pathian sia mite sangin zaataak huai zaw hi. Topa Pathian kiita in na zakta le a kip a kho ngam na nga tu hi. (Pau.9:10, 1:7, lsai.8:13, Ps.33:8, Pau.23:17, Ps.89:7)

(3) Topa Pathian kammal ngai in zui in (Obey Him)LTT kammal
Topa Pathian kiita in a, a thupiakte ni in. Banghangziam cile hite theampo sia mihing a kibitphuana thu ahi hi: Topa Pathian in ka kammalte ngai in a, zui vun. Tua hile Keima in note Pathian ka hi tu hi. Note zongh keima minamte na hi tu uh hi. Note ih na phattuam natu in kong son le kong vaithakte theampo bangin na zui tu uh hi. Tua ahikom nang in na Topa Pathian na it tu hi. Prophet te saan kammalte ngai in na zui tu hi. Tua kammalte a ngai ngawl, a zui ngawlte theampo sia minam sung pan nilkeakna thuak tu hi. Eite in eite atu bekin thi a, a nungta ih hi bua hi. Ih thi zong, ih nungta zong Topa Pathian neisa ih hi a, ama taw bek in ih kisai hi. Tua ahikom Topa Pathian kammal ngai in, ih nungta tu hi. (Thsya.12:13, Jer.7:23, Deut.11:1, Sawl.3:22-23, Rom. 14:7-8)

(4) Topa Pathian muangin beal in (Trust Him)
Atawntung Topa muang in, ama in a tawntung eite hong dal tu hi. Topa muang in beal na hikom thinnopna na nga tu hi. Ama in hong cing hong keam tu hi. Na Topa Pathian sia na thin theampo taw muang in. Nangma ii he na kisaknate bangma hunin muang heak in. Na sep na vawt theampo sungah Topa Pathian phawk in. Tua hile Ama in a maan lampi hong lak tu hi. Topa muanna in mihingte muanna sangin phazaw hi. Mihing lampuite suanna sangin “Topa muanna in phazaw hi, Topa a muang ngawlte ahile senneal ngam ah a po bang dang a po ngawl, kongaw ngam, ci al ngamah a khang sawlpaang kung khat bang hi. Ama tungah thupha bangma piang ngei ngawl hi. Ahihang Topa a muang mite ahile thupha kipia tu hi. Lui hui ah a po, a zung luitui sungah a tha, thingkung khat bang hi. A teete hing tawntung ahikom nisat khuakhal hun a thet hang phamaw sa tuan ngawl hi. Ngua a zu bua hial zonghin thinngim tuan ngawlin a nga, nga tawntung hi. (Isai.26:4, lsai.26:3, Pau.3:5-6, Ps.118:8-9, Jer.17:5-8)

(5) Topa Pathian bia in (Worship Him)
Topa Pathian in keima ngawl pathian dang bia heak vun. Vantung ahizong, leitung ahizong, leinuai tui sung ahizong, note atu in milim vawt heak vun. Milim bia heak vun, amai ah kun heak vun, ci hi. A minthang Topa min pok vun a, thiangtho Pa hong kilat (kilangh) ciang a mai ah kunsuh tu hi. Pathian sia thaa hi, ama a biate in thaa taw ahizong thumaan thutak taw ahizong bia tu hi. Topa bek thiangtho a, minam theampo pai in ama bia tu hi. Banghangziam cile ama thumaan khensatnate mihing theampote in mu siat tu uh hi. (Pu.20:3-5, Ps.29:2, John 4:24, Rom.15:4)

(6) Topa Pathian vaangletna kilanghsak in (Glorify Him)
Note pumpi sia note neisa hi ngawl a, Pathian neisa hi. Ama in manh pia aa, hong lei sa ahikom na pumpi uh sia ama minthan natu in na zangh tavun. Na vawt papo, na neak na dawn papo Pathian minthanna hisak vun. Na pha na sep uh te sia mihingte in a mu ciang vantung a om na Pa uh a pok natu in amate mai ah na khuavak uh taang sak vun. Jesus in a nga tam mamate na nga uh ciang ka Pa minthanna kilanghsak a, keima nungzuite na suak tu uh hi, ci hi. (ICor.6:20, I Cor.10:31, Matt.5:16, John 15:8).

Thukhupna
Leitung ah biakna nam lian thum te in leitung atu ahizong, amate biakna tu ahizong kihilhna thu tampi nei tek uh hi. Tua thute sia thupi sa mama in thipui ngam liang uh hi. Tua kihilhna laite simin nuntakpui uh a, leitung ah mipil, miciim, mihau, milian tampi suak uh hi. Buddha biakna biate bang in hanciam leang pathian kisuak thei hi ci liang uh hi.

Tuni ei zongh pathian kisuak zo liang ngawl tu ahihang hanciam tu thu tampi om hi. Hanciam in sepna taw nuntakna in a hanciam ngawl le a seam ngawlte sangin thupi zaw veve hi. Pathian in zongh thupha hong piak ciang hanciamna le sepna tungah kidoppha hi.

Tua ahikom eite atu in kihilhna thupibel teng sia Lai Thiangtho bu sungah om hi. Tuate hanciamin sim a, simna bangin a nungta thu um mite hi tek tu thupi hi.

Pathian tung vawt tu thu om bang tel in, tua telna taw nisim vawtin nuntakna taw Pathian ompui le Pathian piak thupha tampi a saangte ih hi tu hi.

000O000

A zom hanciam lai tawng….

gates

Kongpi Ceak

annie-hawks

Kong tulmaw
tawntung hi

mission

2013 kum a kipan
mission sep tu zia

Jerusalem - 1937

Jerusalem Mission

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,486 other followers

Leangna hong haw

  • 45,827 phazo

A LUITE SIM/EN KIK TAWNG

Advertisements