Articles, Articles (Sizang Lai)

Satan Biography

Satan

Thumaisot
Leitung ah ih pianni a kipan thinngimna lungngimna, natna satna, zawnna ngauna, thina bona hong pia bek hi ngawlin, ih thi zawkciang ih thaa hell sung hong thenpa Satan ii thu sia ih heak ngawl, ih kat ngawl, ih tel ngawlin phamaw hi. Ama khut sung ih thet thaak ngawl natu le, ama khut sung pan (tawntung hell taw) ih kipeal thei natu deina taw Satan Biography thu ka kaikhawm hi. Satan sia leitung ah hong thetsuk maa, a min sia Lucifer hi a, a khiakna in khuavak piakhiapa Pathian mai ah a lianbel vantung mi cina hi. Ama sia (Morning star, son of the dawn) Nikonghong Aksi ih ci sia hi. Vantung mite sia Pathian in a Tapa zangh in a piansak hi ci ahikom, Pathian ii ngaalpa ahi ih ngaalpa Lucifer zongh Pathian vawt sa ahi hi. Ezk. 28 sungah masaphitbel in a piansak vantung mi hi ci hi. A kipiansak ciilin siatna bangma nei ngawlin phatna bebek taw kidim hi. (Col 1:16, Neh 9.6, Eph 3:9, Jn1:1-3 Gen 1:2) Lucifer sia vantung ah a om lai akua teng taw omkhawm a, a innkuanpui sia akua teng hi a, bang min le bang zaa tek nei ziam ci sia Satan tangthu ih son ciang son ngawlin phamaw hi.

Vantung lalangte
Pathian in hi leitung a piansak lai in vantung mite lungdamin au uh hi ci ahikom leitung mite a pian ma vantung mite piang zo ahi hunlam kihe thei hi. (Job 38:4-7) Vantung mite tam mama a, kisim zo ngawl hi. (Dan 17:10, Heb 12:22) Vantung mite sia Pathian naseam thaa te hi a, ngupnga tute a hu tu in Pathian ii a zak hi. (Heb 1:14) Leitung pumpi le thaa pumpi nei khawm thei hi. (1Cor 15:40) Patangno (or) thu um mite a keamte hi. (Mt 18:10) Pathian bangin hunkhat sungin mun 2 mun 3 ah om thei ngawl hi. Pathian in vantung lalangte sia vui bang, khualeng meikuang bangin zangh hi. (Ps 104:4) Mihingte sia a khut taw hong vawt vateak hi a, vantung lalangte sia piang hen ci in thupia in piangsak hi. (Ps 148:5) Vantung mite sangin mihingte kithupi zaw hi. Mihingte bangin zi nei ngawl ta nei ngawl uh hi. (Mt. 22:30)

Min le zaa a nei vantung mite le a nasep
1. Michael (Who is like God):

michael
Vantung mite sung pan a lianbel, a saangbel, a thupibel, a hangsanbel hi a, ngaal kidona taw kisat vaipuak a la pipa, a General pa hi. Lucifer taw a kidona ah a lampui pipa hi. Israel te a cing vantungmi hi. (Dan 10:13,21) Elisha a cing vantung mi hi. (2 king 6:16) Topa Jesu nasepna a hu vantung mi hi. (Mt 26:53), Ngup nga tute le ngupngasate a panpui, a cing a keam vantung mi hi. (Heb 1:14) Ama tungah phat ngawlna, siatna bangma kimu ngawl a, a phatna bebek kimu hi. Mawsi luanghawm a kituu lai ngangawnin, kamsia pau ngam ngawlin, Pathian in nang hong he tahen ci bek hi. (Judas 1:19) Vantung mite sia a Tapa zangh in a vawt hi na ci hi. Lai thiangtho sungah Pathian taw kibang ci si ahikom, SDA te in Topa Jesus sia leitung ah hong pai maa, vantung ah a om lai, a min sia Michael hi ci in saang uh hi. (SDATintan ka kaa lai Sya Suang Khua Thang tintan hong piak sung ka sin hi)

2. Gabriel (The mighty one of God)

Gabriel

Gabriel

Thu um mite kungah Pathian hesuakna le iungdamna thu a taangko tu in a zak vantung mi khat hi. Pathian le mite kilaklaw ah messanger (kamtai) naa a seam pa hi. Abraham kungah kilangh a, (Gen 17:1-2) Daniel kungah Gabriel pai in a mangmuna thu a son pa hi. Pathian le mite kilaklaw ah Jehovah Palai nasep seam hi. Topa Jesus hong sua tu lai, leitung ah hong taangko pa sia, Gabriel hi (Dan 9-21-23; Lk 1:19-26, 2:10. 3) Michael zom in vantung ah thunei kik bel ahikom, The mighty one of God kici hi.

3.Seraphim:
seraphim

Tha (6) a nei vantung mite hi. A tha 2 taw a mai siin a, a tha 2 taw a peang tuam hi. Atha 2 taw in leang hi. Sun zong zan zong tawlngak hun nei ngawlin, a vaanglianbel Topa (thiangtho, thiangtho, thiangtho) mun theampo ah Ama minthanna taw kidim hi ci in Topa pokin au top uh hi. Mihingte ii mawna le khialna te amate tungtawnin thiangsak maisak uh hi. Jesu hong sua tu lai leitung a dei mite tungah nopna om tahen, Pathian minthang tahen ci in lasa te hi. A hon ahon veu om in naa seam uh hi. (Is 6:2-3, 6:7, Tpl. 4:8, Lk 2:14) Serapim sia singular hi a, plural ciang Seraph kici hi. Seraph le Seraphim kitel khial thei hi.

4. Cherub:

Cherubim

Cherub

Maitang (4) nei hi. A maisang maitang sia mihing maitang taw kibang hi. A maitang ziatsang sia sahang maitang taw kibang a, a maitang veisang sia khui meal taw kibang hi. A nungsang maitang sia muvanlai taw kibang hi. Tha kop nii nei a, a thaphil ciang, tuipi tui kilok nging taw kibangin nging hi. Athakhui nuai ah mihing khut taw kibang khut 4 nei hi. A peang sia mihing peang bang hi aa, a peangpaak sia khui peangpaak bangin kaa hi. A nasep thupibel sia cinh le kep hi. Biakinn kongkha cingte hi. Pathian Body guard in a zakte hi Thukham thingkuang tungah khamtui taw a kizut Cherubim 2 ii lim koi in a kilaklaw ah Pathian tosak in thukham thingkuang cing sak hi. Khut khial, peang khial, kam khial khat a om tha le thilaw thei uh hi. (Gen 3:24, Ex 25-18-20, Ps 80:1, 99:1, Heb 9:5 Ezk 10:4-21). Cherub sia Singular hi a, plural ciang Cherubim kici hi. Cherub le Cherubim a tuam tek hi ngawl hi.

5. Lucifer (Morning Star, son of the dawn) A vaang neina le a nopsakna:

lucifer
Vantung mite sung panin Pathian ii a vawt maksak phitbel vantung mi hi. A sua tuung pan kipan a ngamtatna theampo ah paubanna khat zongh nei ngawl hi (Ezk 28.15). A kicing ettee taak khat hi a, pilna phatna hoina taw kidim hi (Ezk 28:12). Ateenna peuma zongh a nuambel Pathian mual thiangtho tung (Ezk 28:14), Eden huan sungah teang sak a, suang manpha nam (9) bang taw a kizep zawkciang kham taw a kivawt kizepna dang tampi tak zongh nei thua lai hi (Ezk 28:13). Kumpite, Kamsangte, Thiampite bangin sathau a kithiisak anointed Cherub hi. Sathau a ki thiisak anointed Cherubim te sung pan a lianbel (the chief cherub) hi a, Cherubim dang te in ama kicingsak lai hi. Hi bang body guards te taw in, ate nikneak suang manpha te sungah a uuk bang po in vak vaken bek hi. Phatna namkim taw kicing hi. Tuabang hizaw lai le ci natu khat zongh om ngawl liangin kicing hi. Ka mual thiangtho tungah kong teangsak a, a te niikneak suangmanpha te sungah kong vaksak hi ci hi. A nuntak dan noptuak mama hi. Kisap mama khat zongh nei ngawl hi (Ezk 28:12-15).

Nidang lai in a kicing ettee pha khat hi a, pilna le phatna taw kidim hi ci hi (Ezk 28:12). Leitung mite khat zongh a kicing ettee pha kiom ngawl hi, Lai Thiangtho in ci hi. Lucifer sia Lai Thiangtho in a kicing ettee pha hi ci a, leitung mite theampo sangin kicing zaw suak hi. Pilna taw zonghin kidim ci lai hi. Leitung mipil ih cite in pil vaial in, a heak ngawl tam vaial hi. Lucifer ahile heak ngawl mama khat zongh nei ngawlin pil takpi hi. Tuabang a pil hangma in leitung mite hong lumlet niknek zo thei pheang hi. Thusuak po hong umsak in Pathian sia hong ningkhinsak thei hi. Adam le Eve bang omkhawm vahiau tawntung kasap a theam nop ciang Eve ama nguak a om tu hun tuungin theam sia, theam vawk paih hi. Tu ni in zingsang aksite in la sa khawm tek uh a, Pathian tapate in lungdam in kiko uh hi ci hi. Tuate in Leitung pianciil hun na kawk hi. Hi thute ih ngaisut ciang Lucifer sia Pathian in leitung a phuu lai vantung kikhoppi sungah Choir leader seam hi tu in ki um hi. Mi pawlkhatte in lasak thiamna talent nei tu in muangmaw uh hi (Job 38:7). Lai Thiangtho thiam mi pawlkhatte in Satan a puu zawk, Adam pian maa in hi leitung a uk pa hi tu hi ci in muangmaw uh hi. Kam dang khat in son leang, hi leitung ah Pathian ii a piansak mite (Tulai leitung mite ahi ngawl) teang a, tua hun lai in leitung sia Satan in uk hi ci nopna hi. Hi thu sia (Isai. 14) sung le Lai Thiangtho mun tatuam te ah kimu thei hi.

Lucifer sia (Isai. 14-12) sungah “Son of the morning Star,” Nang khuavak ta Nikonghong Aksi awng, na ci hi. (Tpl 2:28) sungah Pathian in Topa Jesus, sia Morning Star Nikonghong Aksi kong pia hi ci leleau si tuak hi. Nikonghong sia thusia bebek a vawt Lucifer min le hi si a, Thupha bebek a vawt Jesus min zongh le banghang hi si thei ziam ngaisut huai hi. Biakna lampui Syate tampi tak ka dok hang hong son thei ngawl hi. Revalation hil cianna in zongh a kikhei in son thei ngawl hi. Mr. Suang Cin Khai, Thuklai in UPC te upna saanna ah, Lucifer sia vantung ah a om lai Pathian ii minphatna a saangbel Zaathuu (Rank) in a piak hi hong ci hi. Leitung ki ukna ah min le zaa a tatuam a om bangin, eg. President ci bangin Nikonghong sia zaathuu a saangbel in a piak hi tuak hi. Lucifer sia leitung hong thet ciang, Pathian ii ngaal phabel hong suak hi. Topa Jesus thina pan ngualzo in hong thaw kik zawkciang minphatna saangbel ahi Nikonghong zaathuu, Lucifer tungah a piak sia, Pathian in Jesus tungah pia hi a ci sia a maan bua nginge zong saan thei hi ka sa, hi. Michael sia Who is like God, Gabriel sia, The mighty one of God ci bangin min a kivaw bang hile kilawm hi.

  1. Lucifer a puuna
    1.Vantung ah ka kaato tu hi ci in kiphatsakna kampau hi. (Vantung a ci sia koisung ahi tam?)
    2. Pathian aksite tung pek ah ka kumpi tokhum ka koitu ci hi.
    3. Lei lulam kikhopna mual thiangtho tungah ka to tu ci hi.
    4. Meeite tung pek ah ka to tu ci in kampau hi.
    5. A saangbel Pathian bangin ka kivawt tu ci in kiphatsakna kam bebek zangh hi. (Isai. 14:12-14)

Hi bangin ki phatsakna kam Ka (or) Kei bebek zanghin a khaksang ciang Pathian dem nopna thin hong nei hi. Mawna tampi theampo sung panin Pathian ii a ngaimawk bel mawna sia, kiphatsakna hi (Pau.6:16-17). Pathian ii a maisak ngei ngawl mawna nam (7) sung pan kiphatsakna in a lianbel mawna hi. Na mealhoina na suang a, na minthanna na suannate in, nang hong amh sak hi. Na sumvawt ngongtat leihna hangin mawna sungah na theng a, ka mual thiangtho panin nang kong hawlkhia hi ci hi. A tee niikneak suangmanpha te sung pan nang hong cing Cherubim te in nang kong hawlkhia sak hi ci hi. A maan ngawl sum na vawtna hangin, na biakna munte na sia sak hi. Nang hong ente muna ah vut le vaaikongsua hi ci hi. Pathian kammal hi (Ezk. 28:16,17, 18)

Vantung ah ngaal kidona
WarLucifer sia a sua pan kipan bangma sitbaang ngawlin Pathian dei bangin om thei nginge napi, Pathian ii piak pilna, thiamna, hauna, min le zaa te a khuangei ciang kiphatsak pui in, a piangsak pa, vaang a piapa Pathian dinmun dei in a suan nop ciang, a phatna theampo nusia in, siatna lamah hong kihei hi. “Kei” ci kiphatsakna kam bebek zangh hi. A khaksang ciang, vantung lalangte a nga zawk zazaa a nga natu in hanciam a, vantung lalangte khen thum sua khen khat nga man hi. Pathian in a ngalkap General Michael zanghin Michael le a pawl vantung lalangte in,
Lucifer sang pawl vantung lalangte, vantung ah ngaal kidona om hi. Lucifer in ngaal a lel ciang, a nga sa vantung lalangte khen thum sua khen khat taw, tu in ih teenna hi leitung ah Pathian in khiasuk hi. A khiaksuk ciang vantung mite lungdam mama uh hi ci hi (Tpl. 12:4r 8:12). Lucifer ngaal lel in leitung ah a hawlkhiat hun le Eden huan sungah Adam le Eve te nupa ngulpui ii a theam hun kikaal sia khuangei mama hi napi, Satan min pu paih ngawlin ngulpui min taw hong pai hi. Michael le Lucifer te a kido lai zongh in, Ngulpui in a mei taw vantung mite khen thum sua khen khat a pik (a laak) lai in ngulpui min na pu zaw hi. Ih ki heaksaknop bulpi in, Pathian ii hi leitung ah Lucifer le a lawmte hong khiaksuk hun le Adam te nupa a theam hun kikaal, hun sau mama om a, tu in ih heak leitung mite ahi ngawl leitung mi pawlkhat na om zo hi tuak hi ci in Laithiangtho thiamte in son uh hi. Satan ih ci kammal sia Job Lai thiangtho sung panin kimu pheang hi. Job Lai thiangtho bu sia, Lai thiangtho bu theampo sung pan a ki at masabel hi tuak hi. Job zongh Jacob ii tuupa hi tu in Lai thiangtho kan mipilte in muangmaw uh hi.

Satan sia a hun. a mun. a sepna zui in min kiphuak
Thusia bebek a vawt Satan sia vantung ah a om lai, Lucifer, Nikonghong le Ngulpui ci in min nam thum nei hi. (KJV Isai 14 12-16, Ezk. 28:11-16) Lucifer sia Pathian in leitung ah a khiaksuk zawkciang Satan veu ci hi kaleang taanghlai Ngulpui min taw in Job hun dong kizangh to zaw hi. Tua zawkciang Satan min hong pu pheang hi (Tpl 12:7-9, Job 1.6-7, Mt 4:3, 6:10). Vui sungah thu neipa, (Eph 6:12) leitung ah khuamial ukpa (Jn 12:31), Mi theam pa (Tpl.20:10), leilot bu (Gen. 3:4-5), Mithat pa (Jn 8:44), Ngilo pa (Mt 5-37), Ngaal pa (Mt 13:39), Zia en pa (Jn 8″44, Gen 3.3-5) Nganhing ngilo (Tpl 13:8) Doai mangpa (Mt 4-1-11, Tpl.12:9, Eph 4:22) Leitung a ukpa (Jn 14:30,16.11), Belial Christ in bangbang Belial Doaimangpa taw kipawl thei tu ziam (2Cor 6:15), Beeizebul-Doaimang lianbel pa (Mt 12-24) ci in ama ngamtat phat ngawlnate le a nasepnate sisan in min tatuam neisak uh hi. (Jn 10:10) sungah ngu tu, that tu, siasak tu, ci in a son bangin, ih ngu a, ih that a, ih leilot a, mi theamin ih hi le, ei zongh Satan tate (Jn 8:34) na hi uh hi hong ci bangin kihi paih hi.

Thaa ngaal kidona
A kipatciil in sia le pha tungtawnin ngaal kidona om tan a, leitung sia chi le naai taw kidim in, kam in son zawk ngawl mi tampite ii thaa te maimangin ngilopa omna hell sung hong thenpa in Satan hi. Tuni dong ma in thaa pawlpi sungah thinngimna, haksatna, zawng khalna a tatuamte piangsak hi. Hi ngaal kidona in, tawp kik hun a nei tu peuma hi nawn ngawl a, a mong a thet dong a paisuak tu ngaal kidona hi zo hi. Hi ngaal kidona ah lampuipi khat sia, Ngitlona theampo te ii topa Satan hi a, a lang khat panin phatna namkim a piangsak ngual zopa Pathian ahi hi. Hi a kibang ngawl pawl niite bangma hunin om khawm thei tu ahi bua hi. Tua ngaal kidona in mulkimhuai takin kidona hi a, mulkim huai tak ma in a bo tu ahi hi. Tua ngaal kidona in tu ni dongin ih nisim nuntakna sungah mite thin le thaa hong liamsak in ih kiimkot teng ah vuipi bangin hong thato in hong nanuai hi.

Satan om takpi ma ziam?
USA ngam sungah thuhilsya Pator 100 sung 50 in Satan om takpi hi ci in um ngawl uh hi. Luasuk mawna zongh om bo ci uh hi. Mawna ih vawt le mawnei kihi a, Adam le Eve te tungtawnin ih nga luasuk mawna hi ngawl hi ci uh hi. Satan hi, luasuk mawna hi, om takpi a, tua thu saan thei ngawlna sangin a heehuai zaw ei Christian te atu in thudang om ngawl hi. Jesus hi leitung hong paina a bulpi in, luasuk mawna hangin a thi tute pamai hong sa a, ih suatak thei natu, hong tan tu in hong paisak hi. Luasuk mawna om bo a cite sia Messiah hong pai ngawl lai a cite, Jesu a langpan te suak ahikom khantawn ngup nga thei ngawl tu hi, Jimmy Swaggart in ci hi. Paul sia Jew te sungah ngupna thu a son tu hi a, son ngawl zaw in Gentile te kung (Ei kung) hong son zawkna a bulpi in hisia hang ahi hi. Hesuakna hun sungah a om eite ii ngupna ih saantheina ih hamphat law theina thu in hi thu hang hi. Satan sia a mi mama in om takpi a, leitung thusia theampo a piang sakpa hi.

Satan ih ci kammal in thusia vawt pa a cina hi (Job 1:6-7). Topa omna vantung ah vantung mite kikhopna khat nei a, tua meeting sungah Satan zongh kihel hi. Topa in Satan tungah koisung panin hong pai ni ziam ci in a dok ciang, leitung mun theampo alu pan ataw dong ka va kakoaina pan kong pai ci in zo hi. Hi thute ih et ciang, Satan in Pathian mai ah bangma thu neina nei ngawl hikale, Pathian ii khuan piakna ciang khat dong ngamta thei hi ci in ih he thei hi. Pianciil thumna sungah mihingte a puksak mittang taw a kimu thei ngawl ngaal khat om a, tua ngaal pa in Ngulpui sia hiam zakin zangh hi ci in hong lak hi. Tua doai mangpa in Pathian naseam te puu natu in ahi thei tawpin hanciam hi ci zongh ih heak tu kilawm hi. Thumaan ngawlin ih ngamtat ciang, kei sia akua ta hi khi ziam ci in ih kiphawk thei buale Satan ta kihi hi.

Topa Jesus in hell thu a sonna
Leitung buppi na nga zong, na thaa a mangthang le leitung na nuntak in, bang phattuamna peuma om thong ziam hong ci hi (Mt 16:26). Khutcing, peangcing mittang cingin hell sung na thet uh sangin, khutlang, peanglang, mittanglang taw Pathian ngam ih thet tu hong deisak zaw lai hi. (Mk 9-43-47, Mt 5.29-30). Thu um patangno khat lam ih khialsak sangin, ih ngawng ah an ngoaina suang khat khii in tuipi sung kikhiasuk leang pha zaw pek hi hong ci hi (Mk 9:42). Hell mei sia mit hun nei ngawl aa, hell sung a thengte ii sa a ne, thanh te zongh thi hun nei ngawl hi ci in hong son hi (Mk 9:48). Piangthak ngawlin a kipiangthak sak te a khut a peang lethen in, a puasang khuazing sungah kilawn tu a, kaana le hangoaina thuak tu hi hong ci hi (Mt 22:13). A kihi sak biakna lampuite awng, bangbangin hell taw kipeal thei tu ki um ngam nu ziam ci in a pau sia eima hong cina hi (Mt 22:33). Sumhaupa le Lazarus thu taw hell ngam ii a lauhuaina hong son hi (Lk. 16:19-31). Tua ahikom pumpi le thaa a that thei pa kiita zaw vun hong ci hi (Mt. 10.28) Jesu in hell pan ih suaktak tu hong deisak mama a, Ama mama hong ngum tu in hong pai hi. Jesu ih nei mateng ih lungtang sia Satan in hong lua a, Satan ta kihi nginge hi.

Hell sung akua teng theng tu ziam.
Thuciamlui OT sungah Hell thu a sonna tatak om lian ngawl hi Topa Jesus hun ciangin cing takin le a lauhuai na hong son pheang hi. Topa Jesus hun ma in Kamsangte Thiampite in Jesu son bangin a son thei kuama om ngawl hi. Ngilo pa Lucifer ii ngim thuak natu ngangawn Thuciamthak NT sungah hong telson pheang hi. Hell a vawt sia Pathian ama hi a, Lucifer leitung ah a khiaksuk lai a vawtsa hi zo hi. Mingilo te mithat te a thi ciang hell sung a thet tu sia kisaang thei a, ngitlona a nei ngawl midik mama khat a thi ciang hell a thet tu sia, suak veu kisa ngawl tek hi. Topa Jesus in kei taw a kipawl ngawl peuma ka ngaal hi hong ci hi. Piangthak ngawl peuma hong cina hi. Sonteena in Kumpite ii a khaam, lai ngatang kimai te, palikte in a mat ciang, a kiim ah a om a kimai ngawl theampo taw man khawmin thong sungah a khum bangin maw nei a kisa ngawl theampo zongh, Jesus a nei buale maw ih kisak ngawl hang hell sung a kitheng tu kihi hi. Pathian in a vawtsa mite theampo hi a lauhuai hell sung ih thet thak ngawl natu in, a Tapa hong paisak a, Tapa a nei ngawl theampo hell kitheng tu hi. Pathian in (do or die) hong ci bek hi. Taza (တရား) khi hi hong ci hi.

Satan Biakna lampuipa
Satan in thu um mite sungah na hong sep tum ciang, mi nautaang te hong zangh masa ngawlin, biakna lampuite Pastor te hong zak sia, Satan ii strategy khat ahi hi. Satan in thu um mama khat bangin na hongseam hi. Pawlpi sungah etlawm tak le deihuai takin na hongseam a, mihingte ii ih tel zawk ngawl dongin hong lungdamsak thei hi. Thumaan thutak ma hi ci in hong umsak thei hi (2 Cor 11:15) Vantung mite bangin meal kisealin na hongseam thei hi (2Cor 11:13-15). Pawlpi sungah Pawlpi keam Syate, Pawlpi Upa muanbelte Satan in hong zak ciang a lu sang len thuneite ahikom thakhat thu in ih tel paih zo bua hi. Pawlpi sungah supna zanna tampi tak ih thuak dikdek zawk, pawlpi thakiam zawkciang kitel zo pheang ahikom Pawlpi Sya le pawlpi Upa tu sia Thaa Thiangtho taw a kidim tu thupi mama hi. Kum tampi sung thuak dikdek zawkciang kitel thei pheang ahikom, tu le tu in ih pawlpi nuntakdan ih kisittel tu kisamh mama hi. Na muna a maan nale hang takin phuangin son in, hil in. Pathian deina hi. Upna no Christian pawlkhatte in hong buaisak thei hi. Mi pawlkhat in nalamdang khat a pian papo ciang Pathian ii sep ma sa papaih hi. Satan in nalamdang vawt thei leilam hi. Hi bangin up khialna hong piangsak hi. Tua in Satan deina, ngiimna Satan ngual zawna hi. Satan mun pia heak vun. A zaa (7) hong tum tu hi John Bevere in ci hi.

Satan hun bona
Vantung panin vantung mite khat hong tuaksuk ka mu a, taw nei ngawl (bottomless pit) leihawngpi khat a kha natu in tawtang (key) khat le thikkhau lian khat a toai ka mu hi. Ama in taanghlai ngulpui Doaimangpa Satan sia pummat in tua thikkhau taw a hencip zawkciang minam tatuamte a theam kik thei ngawl natu in tua leihawngpi sungah Kum 1000 a cin dong a om tu in khiasuk a, kongkha khanelh in khumcip tu hi. Kum 1000 a cin zawkciang tawmvei sung kitha kik tu a, leitung theampo ah a kithethaang Gog le Magog minamte theamin a kaikhop ciang tuipi vaal senneal za in tam hi. Amate in leitung bup ah kizel in Pathian mi thiangtho te le a ithuai khuapite uumcii tu uh hi. Ahizong Pathian in vantung pan meikuang hong khiaksuk in kaangtum tu hi. Amate a theam Doaimangpa zongh sahang le leilot thuhi. Kamsang te omna kaat meiphual sungah khiak sukna thuakin sun taw zan taw a tawntungin vawtsiatna thuak tu hi Tua daan tatna in kum 1000 sung mindaina le ngimna taw hong kipanin, a tawpna ah tawntung meilipui sungah kihal tu hi (Tpl.20:1-10). Jesus in Satan sia Kalani (Calvary) mual tungah a zawsa hi a, tua hun in, Satan thongtaak kipat hun hi. Amate maitang pan thitui theampo nawl thiang sak tu hi. Thina zongh om nawn ngawl tu bek dom ngawlin thuumna tauna, natna, satna, heena, kaana zongh om ngawl tu hi. A masa nate theampo mangthang siatzo hi. Pathian tate in tua ni lian in, zingsang khuavak muakin lungdamna taw au vaniau tu hi ci hi. Halelujah, Amen.

Satan hong Thaangsiana an (The Bait of Satan)
Satan in mihingte hong theam natu in kingh li (mun theampo) panin hong pang nginge hi. Bangbangin thaang hong sia ziam? Ngasa tangthaak pa in ngasa du tu an taw ngasa a zol bang, a tangthaak bangin, Satan in thu um mite hong mat natu, hong khil natu in lam tampi taw hong pangin ih du nano taw hong zolin thaang hong sia hi. Ei ii ih heakbel numei khawng, zu khawng ih thupi son hi. Hite in mining khat le nii ii puuna hi bek a, mitampi ii puuna hi ngawl hi. Pathian thu ahi Laithiangtho ih sim nop ngawl natu in thaang hong sia in, ki awk tek hi. Pawlkhatte in a sum nei papo taw video le khui pha nanote lei in innkuan bubup in, ankuang um bang liangin ki en hi. Patangte in Cartoon, Power ranger, khanghaam zawhiat te in bawlung poai ci bangin anneak tu phawk ngawl liang, mut nangh liangin hong ensak nuam hi. Khangnote bek hi ngawlin nupihuai pasalhuai te ngangawn in TV game, Computer game, Korea film taw hong nivui sak hi. Zing le nitak thu kikup bel, thuson belin kinei hi. Satan thaang sungah ki awk tek hi.

Leitung pilna ih nga natu in, sum tampi hun tampi bo in kizong siasua hi. Nei ngawl pipi ma in Tuition kikaa sak tek a, text book bang sia, a lu a taw tam veipi tak lumlet in tun liang kasap, hite sangin a thupi zaw nuntak tawntungna ih nga natu Lai thiangtho sia kisim kilkel ngawl, heak mama ih nei bua hi. Satan in bang an taw hong zol a, hong sia hi tu ziam? Distinction nga kul bo Lai on zawk natu ciang lai ih et za beak taw Lai thiangtho sim zen leang, Topa ii hong itna thumaan thutak telin piangsual zongh ki om ngawl tu hi. Pathian thu heak mama nei ngawlin kipiangthak nuam tek hi. Lai thiangtho bu sia innsim misim in kinei a, pha tak beak zong kikeam meal ngawlin thakhun po kaaisak, mom po bu sak, meikhu po kibaangsak hi. Topa Jesus lim bang sia, vuivak khawng ciang a lalaam, lohunna bangin kikhai lalawm hi. Nu le pa te maw, Pawlpi keam Syate maw kisap mama na khat kinei hi. Mipi in tu bang niuneu in ih om sia ahi tu ma kisa hi. Biakna dangte in hong thusim ngei peuma ngawl tu hi. Jesus a minthang sak te ih hi buatu a, Jesus a zazuak te kihi zaw tu hi. Satan in bang an taw hong sia thong ziam. Hi sonteenate sia John Bevere sonteenate, eima inntual thu taw kisi tu in ka belap hi.

Thu khupna
Satan sia ei sangin pilzaw, hat zaw a, datham hun nei ngawl hi. Toi ing ngim ing ci hun nei ngawl hi Siatna khat a vawt tu sia lawp tan hi. Leitung mite hong nga zawk natu, hell sung hong thet zawk natu in sun taw zan taw tawlngak hun nei ngawl, mittang khat zongh si ngawlin, hong encik nginge hi. Ngua khawng zu in khua khawng hong sia le nuamsa zaw vaial a, ka Thaang sungah kua teng a awk tam hong ci bek hi. Tua thaang sungah ih awk thaak ngawl natu le a awk sa mite a hunlap in Jesus kung ih zot thei natu in Satan Biography taw kong kaizawn hi. A awk mite a suatak tu in Jesus in nang le kei hong zangh nuam hi. Biakinn kikhop, sumpi piak, thunget, lasakte kul mama hi nave, hite in Pathian le ei kizopna hi pheang a, Pathian naseam kihi ngawl lai hi. Jesus in a nuntak hunsung le a thi a thaw kik zawk hong kam vaithak thupi belin Sawlpi The great Commission thaa mangthang mat tu hi. Hi lai a sim theampo in Satan thu tel in, Satan Thaang pan ih suatak thei natu le, koltaang sa te a suatak zo tu in Pathian in hong siam tek tahen.

Heak tu:
Tu laitak Biakna iampui minthang Jimmy Swaggart ii Hell, John Bevere ii The Bait of Satan le laibu tatuam ka simna sung pan zong ka laak ahi hi.

Advertisements

Discussion

One thought on “Satan Biography

  1. Hoih mama!

    Posted by Vungh Lian | April 25, 2014, 3:11 pm

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,482 other followers

Leangna hong haw

  • 46,912 phazo

A LUITE SIM/EN KIK TAWNG

Advertisements