Articles, Articles (Sizang Lai)

US Sizang Tuiphum Tangthu Tomno

USSBC

US SIZANG TUIPHUM PAWLPI tangthu ih son tu ciang ih kipatna bulpi ahi Zo/Chin buppi ih, ih Tapidaw Pu le Pi te makngil thei tu ahi bua hi. Zo ngam bup Tapidaw suak masa phitbel sia ih heakteksa bangma Pu Pau Suan le Pi Kham Ciang 10th July 1904 leh Pu Thuam Hang le Pi Dim Khua Cing 25th July 1904 ni in Topa Jesu sia ka ngumpa le kahonpa hi ci in Sya Shwe Yan tungtawn in hong sang masa bel uh hi.

A mate nupa kop ni sia Zongam Tapidaw theampo ih bulpi hi aa, Sizang mi Thuantak tuu, Khuasak khua pan ci zong ih heak tek sa hikale khatvei ma ih pualaak kik thathua nuam lai hi.

A mate ih Tapidaw hong sua hun lian in Thiampi zaa ( Tuiphum thei tu ) om ngawl a hi man Dr.E H East ih om thei hun 1905 May 11 ni in Ak-awm lui ah Pa, Tap,a Thathiangtho min tawh Rev.Dr. East in tuiphum na nei thei aa, A masa phitbel Zongam bup pawlpi zong 1906 kum in Khuasak Tuiphum Pawlpi hong kiphut hi.

DSC_0040Zongam bup pawlpi kipatna sia atom in hibang teng hi aa, USA leitang tungah Sizang Tuiphum Pawlpi pian khiat na zom to leang;

Sizang mite sia ih thet na papo ah Topa biakpiak tu ki uk mama, ki om thathong thei ngawl aa, US a theng masa ih Sizang mipui te zong Kawlngam ah Mission hong puak pawlpi a hi Calvary Baptist Church ma na zuan masa in, na ki hahel phot uh hi.

Tua lai Sizang mi na pawlcing hi leh Sizang Tuiphum Pawlpi sia tua hun lai pek pan na kipan zo tu hi ci in ka um hi. Tua hun lai Kawlngam mi a minpiang a kikhawm thei sia pawlcing ngawl het lai hi kale CBC ah Pastor a seam Rev. Lynn ih deisak na tawh 1997 Feb.2 ni in Kawl kam taw biakpiak na Burrel Hall ah Pawlpi mi 17tawh na kipan thei uh hi. Tua hun lai zong eima Sizang Tuiphum mite ma founder (Puiding) hong seam uh hi.

Sizang mi US a theng ki belap tato aa, Sizang Innkuan kikhop zong hong nei tato uh aa, 2006 kum ciang Sizang mi theampo Pawl ki doidan na om ngawl in Sizang kam taw biakpiak na Sizang Burmese Mission Church hong ding to thei hi.

2010 March 20th ni in ih Bulpi ahi Pu Pau Suan le Pu Thuam Hang leh SRBA tawh khut kilen in nasep khop kik tu leh Tuiphum pawlpi ih ngeinate ih lungngul na tungtawn in, Pasal tingteng 16 bang US ngam ah Sizang mi khangham bel a hi Pu Ngaw Khup te inn ah meeting ki vawt hi.

Tua mun pan Sizang min taw pawlpi khat om zo ahiciang, Sizang Tuiphum Pawlpi ci in Pawlpi khat kipat thua tu sia pha tu ziam ci thu kikup na ki nei aa, a khakbel in tua meeting a pai teng ih thukimna kila aa, Tuiphum pawlpi kipat tu athukim (15) leh a thukim ngawl (1) bek ahiman Tuiphum Pawlpi paidan dungzui in atamzaw thukimna tawh Tuiphum Pawlpi kipat tu ki khensat hi.

Tua hun pan kipan ” Simbeng zong kim citciat, tangzang ki nguan” ci bang ma, anuai a bangteng Acting Committee vaipuak ki pia hi.
(1) Pa Tual Vum
(2) Pa Lian Do
(3) Pa Kap Khan Do

April 24th. 2010 ni, a (2) veina Meeting Pa Tual Vum inn ah kinei kik aa, Pawlpi sung thu kizaak sakna a nuam zaw tu-in Pawlpi atu E-group neitu leh Pawlpi min tu kikupna ki nei aa, Siyin Baptist Fellowship ci leh US Sizang Tuiphum Pawlpi cite ni ngaisut kaak n aki nei aa, US Sizang Tuiphum Pawlpi (US Siyin Baptist Church) atom in USSBC ci tu thukimna ki nei hi.

May 29th. 2010 ni, a (3) veina meeting Pa Thang Khua Thawng inn ah ki nei aa, Biak inn mun tu leh Pawlpi kalsuan natu Thukhunpi leh Thu bullet (Constitution & Bylaw) vawt tu kikup na kinei hi.

July 10th. 2010 ni, a (4) veina meeting Pa Lian Kam inn ah kinei aa, Pawlpi Register vawt tu vai leh Pawlpi Logo vawt tu vai kikup na kinei hi. Acting Committee tu-in a omsa teng baanah Pa Kam Khan Kimlai leh Pr. Awi Khawm Huai ki belap hi.

DSC_0149August 28th. 2010 ni, a (5) veina meeting Pa Cin Do Khup inn ah kinei aa, Pawlpi min tawh biakpiak kikhop nei pal thei natu kikup na kinei hi. Tua ni meeting kipat ma in Pawlpi ih kalsuan tu zia leh Kumpi tawh kizop natu ahizong, Association leh Convention tawh kizop natu vai tatuam te ahizong kikup na DC Baptist Convention pan Associate Executive Director pa Robert Cochran tawh kimu na leh thu kikup na kinei hi.

October 16th.2010 ni, a(6) veina meeting Pa Kap Khan Do inn ah ki nei aa, Pawlpi ih Thubulphu Laithiangtho John 4:24 ; tuni dongciang ih zak Pathian kammal sia tealna leh Logo kipsakna kinei hi.

December 25th.2010 ni Pawlpi mintawh Nipi ni biakpiak kikhop ki nei zo ngawl lai hi kale Acting Committee te leh Pr. Ngiak Ngo Neam, Pr. Awi Khawm Huai te ih lampui natawh a khat veina US Sizang Tuiphum Pawlpi min tawh Lungdamvawt (Christmas) a nuamtak in ki muak thei aa, inn lum hong kawm Pa Ngo Dal te innkuan tungah zong ih lungdam na ih ciamte hi.

March 19th. 2011 ni, a (7) veina meeting Pa Tual Vum inn ah kinei aa, Pawlpi Registration vawt natu a kisam Pawlpi Mungpi (Trustee) kise na kinei aa,
(1) Pa Tual Vum
(2) Pa Kam Khan Kimlai
(3) Pa Kap Khan Do teng ki koi hi. State Kumpi tetungah register vawt tu tatak ciang a tawmbel mi (4) kisam ahiman Pa Lian Do ki belap thua kik hi.

Pawlpi mimal bangza tatak kipha tu ziam ci-in min sazain kaikhop na kinei aa, tuani-in Pawlpi mikipp tatak tu innkuan (7) bek kipha hi. A mimal in patangno tawh a kingawm (21) bek kipha aa, Covenant member a om sasun Sizang Tuiphum Pawlpi min tawh Pawlpi ding petma tu ih hi ciang panmun ki nguan tawng ci-in ki vaihawm aa, Pawlpi upa tu takpi zong 12 kicing zo ngawl hi. Covenant Member om sun (7) teng ” Thing om ngawl na ah Ngua kizangh ” ci bangin Pawlpi upa in kikoi siat aa, panmun hawmna anuai abangin kinei hi.

1. Chairman; Upa Tual Vum
2. Vice Chairman; Upa Thang Khua Thawng
3. Secretary; Upa Kam Khan Kimlai
4. Asst. Sec.; Upa Lian Suan Khai
5. Treasurer; Upa Kap Khan Do
6. Asst.Treasurer; Upa Thang Tun
7. Praise & Worship leh La; Upa lian Do
8. Auditor; Tg. Thang Za Hang

April 23rd 2011 ni, A masa phitbel Pastor team meeting Hotel ah kivawt thei aa, tuani ma in A masa phitbel Church Council meeting Upa Tual Vum inn ah ki nei thei hi.

Pawlpi kipan tawm ih hi bangma Pawlpi nuntaak natu zong hi valiam a, a kipan tawm tu kihi ahiman Pawlpi Pastor kicial zo ngawl lai tu ahiciang anai a om Pr. Ngiak Ngo Neam, Pastor Awi Khawm Huai le innpaam Pastor teng hungen in, ahithei bang kalsuan phot tu ngaisut na kinei hi.

Mihing te sangpan hibang ngaisutna kinei hi kale Topa in Ama phusa Pawlpi ah Tuu cing omngawl tu hong awi ngawl ahiman, a naseam pa Rev.Kip Thian Pau hong puak aa, ” Thasum nisum zong kul bo, Pawlpi kipan tawm sia topui kul tu hi ” ci-in a it mama a zi ata, a tuu a mo leh a innpui nuam mama teng nusia in, Pawlpi in bangma ki pia zo ngawl het hi kale Pathian a itna leh Pawlpi hong it na tawh ei USSBC Pawlpi kum 2 sung tawntung hong uap Rev. Kip Thian Pau tungah lungdam na lianpi ki nei hi.

Pawlpi sung Minister tu-in Pastor team meeting pan hong kikupna om bangin Church Council ah thu hong puak uh aa, a nuai abang in kipsak na kinei hi. (USSBC-CC 2. (b).2011).

1. Senior Pastor Rev. Kip Thian Pau
2. Associate Miniter Rev.Dr. Thuam Cin Khai
3. Assistant Minister Pr. Ngiak Ngo Neam
Pr. Awi Khawm Huai

Sizang Tuiphum Pawlpi min taw biakpiak na sia April 24, 2011 (Easther Sunday) ni pan Oakland Mills Interfaith Center, 5885 Robert Oliver Place, Columbia ah Pawlpi honna Rev. Kip Thian Pau in hong nei pui aa, Biakpiak kikhop na nipi nisim in ki nei tato thei hi. Tua ni Pawlpi hon tu thu sia USA ngamsung a om Sizang mi theampo khatzong pealngawl in sapna lai kithak siat hi.Hi biakinn sia April 24th 2011 pan Dec 18th 2011 dong kizangh hi.

Tua hun lai Biakpiak kikhop na tu khan no khat leh Church School te kikhop na tu khan no khat ki saap hi. (Khat vei Church Choir sinin mi 9 in Choir ka sak uh le hong ngai tu bang om ngawl dektak hi.)

2012 kum ciang Pawlpi sung eite tawh khut kilen a naseam khawm tu Pr. Lian Khai Topa in hong puak thua laleau aa, Topa tungah tampi tak lungdamna ih nei hi.

2013 January 5th USSBC Annual Meeting pan ih Senior Pastor Rev.Kip Thian Pau in a zi ih damngawl na huvau in a ompui kultu ahi nathu tungtawn-in Pawlpi ah hong om thei nawn ngawl natu thu hong pualaak hi kale Pawlpi in Senior Pastor pa hong om thei nawn ngawl tu thu sia ngaisut hamsa kisa mama a hikom khensat na kipia pai thei ngawl aa,Pawlpi kumcinh ( Anniversary ) dong hong uap kenkon lai natu hesuak kingen aa, March 30th, 2013 USSBC EC meeting Pa Lian Kam inn pan khensat na kinei zo pheang hi.

Rev. Kip Thian Pau (Senior Pastor) hong om thei nawn ngawl tu ahiman Rev.Dr. Thuam Cin Khai Church Pastor tu-in tuani March 30th, 2013 ni ma in ngetna kinei aa, June 29th 2013 ni-in ih Pawlpi ah hunbit hong om tu-in amate innkuan omna Syracuse, New York ah ki muak to hi.

Topa hong tonpui tawntung natawh March 23rd. 2014 ni-in Rev.Dr. Vungh Lian leh March 30th 2014 ni Pr. Tual Lam Kim ih Pawlpi sungah Topa in hongpuak thua ahiman Topa tungah tampi takin lungdam na ih nei hi.

Tua hun pan kipan tu ni dong ciang kum (3) hong cing to aa, kum (3) sung tawntung Ama biakpiak natu biakinn limci mama tawh, ama pok natu tumnging tatuam ahizong, vanzak tu tatuam ahizong, A ma apok tu Pawlpi mimal mama ahizong hong khanto, hong sik diudeu ih biak Topa in Vangletna, Ukzawk na leh minthan nate tang tawntung ta hen.

USSBC MEMBER KHANTO ZIA

Year Covenant Community TOTAL
Kipat lai 24 7 31
2011 kumcin 47 25 72
2012 kumcin 63 34 97
Tu laitak 82 43 125

(Phawktu; Tu laitak Covenant member 82 bang kipha to aa, ahizong hunbit nasep nei sia mimal in 28 bek ki om ahiman pawlpi mitheampo nasep limci ih nei thei natu ihbiak Topa tungah ih ngen thathua lai tu hi.).

Tepte tu akilawm, tepte khial leh belap tu kilawm thu le la tampi tak om tha tu hi. Khat le khat ih kicinh laak nate ihbiak Jesu min tawh nong maisak tu-uh hong thum masa khihi.

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,487 other followers

Leangna hong haw

  • 44,768 phazo

A LUITE SIM/EN KIK TAWNG

Advertisements