Thumaan Lam Hil Lai Thiangtho

Ka tapa awng, kong hilte mangil heak in. Vawt a, kong sawlte a tawntungin ciamtee in. (Paunakte 3:1)

A zezen leitung pilna neite in khansau za vawt thei a, tua khansau za a ne theampo a khan uh sau zaw takpi in hile, kikhawng mama tu in ka um hi. Mihaute in tua khansau za lei phitphet tu a, a zawng te zong a nei susun sum le pai taw a lei zawk zaza tua khansau za sia lei tu in ka um hi. Ahihang ei tapidaw Pathian thu-umte atu khansauza om takpi a, a manh zong piak kul ngawl in, a thongin hong kipia hi ci leang ih um tu ziam?

Pathian na cidam khansau thei natu a kisam theampo Lai Thiangtho sungah hong koi sak zo hi. Lai Thiangtho bu sia ih pumpi atu owner’s manual book hi ngi-nge hi. Motor thak khat lei lete koibang zangh tu, koibang keam tu, koibang pua tu cite theampo a ki-at manual book zong om pai hi. Vanh khat papo, nai ahizong, computer ahizong lei leang owner’s manual book om siat hamtang hi. Ih vanh lei sia zakdan ahizong, koi bang zangh ii koibang dawm leang ngei kizangh zaw tu ci thu te tua owner’s manual book sungah kiat dildel hi. Lalna khat nei le zong koibang pua kik tu ci thute zong ki-at lai hi.

Motor khawng computer khawng bangma ih pumpi sia phatatak zangh bualeang lal thei mama hi, natna zong kinga thei mama hi, thi zong thi thei lai hi. Tua ahikom, vanh tatuamte zakdan pha, kepdan pha le puadaan manual book sung ki-at bangin ih zak tu a thupi mama bangma ih pumpi zong Pathian ii hong piak manual book ahi Lai Thiangtho sung ki-at bangin ih zak tu thupi mama hi.

David kumpipa na Psalm late 119:73 ah hibang at hi

“Nangma in kei nong bitphua a, a bit in nong keam hi; telthiam theina hong pia tan, tua hile na thukhamte ka he tu hi.”

Thuhil kikna 32:47b na zongah

“Tuate zui vun tua hile na lua tu uh Jordan ngalkhat ngamah khansau in na nungta tu uh hi” ci hi.

Hi Lai Thiangtho munte ih sim ciang, Pathian na “zui tu kong piak thute bangin na ngamta uh le na khan uh sau tu a, leitung nuntak nuam na nga tu uh hi” hong ci hunlam kician mama hi.

Atungah a ki-at Pathian kammal Paunakte 3:1 sim kik leang

“kong hilte mangil heak in, vawt a kong sawlte a tawngtungin ciamtee in” ci hi.

Pathian na koibang ngamta, nungta leang hong dei ziam ci thu ahi hi.

“Na thin theampo taw TOPA muang in. Nangma ii he na kisakte bangma hunin muang heak in. Na sep na vawt theampo sungah TOPA phawk in, tua hile ama in a maan lampi hong lak tu hi. Na hina sangin a ciim zaw in kituat heak in, TOPA muang lel in a, a maan ngawlte vawt tu nial in. Tabangin na hile zatui pha bang hong hi tu a, na liamnate hong dam sak in, na natnate hong nuamtuam sak tu hi. Leitangh tung pan a piang nate sung pan a pha belte piakna taw TOPA bia in. Tabangin na hile na ansaal sia antangte taw kidim tu a, na khol natu om ngawl liang dongin sapittui tam mama na nei tu hi.” (Paunakte 3:5-10)

Hi Pathian kammal sungah ih ngaisutna taw ih bat zawk ngawl thuthuk pawl khat om hi. Hi Pathian kammal om bang nungta le te, pumpi cidamna, Pathian muan theina, thin nopna, thin phatna le mihingte ii ngaisutna taw a kiban zo ngawl leitung thupha a nanam ih nuntakna sungah ih nga tu hi. Pumpi ii cidamna sia thaa cidamna nung zui in piang hi.

Suapui awng tuni Pathian kammal Paunakte 3:1-10 phatatak ih sim kikik tu a, Pathian tungah thaa cidamna, pumpi cidamna le mihingte ii ngaisutna taw ih bat zawk ngawl Pathian thuphate ih tel sitset zawk natu tel theina thupha, tel thiamna lungtang hong pia tan ci in thungen tawng.

Note: Pastor Rick Warren ii thuhilna “The Bible is the owner’s manual for your body” ka doppha hi.

Thawngno