Articles, Articles (Sizang Lai), Sya Kip

KHUAVAK PUAK TAWNG

By Rev. D. Kip Thian Pau

Thu Patna
Pathian in a kipatcil in vantung le leitung bitphua hi. A hihang khuavak om ngawl hitana bangma kimu thei meal ngawl, khiakna nei meal ngawl hi tuak hi. Tuaciang Pathian in “Khuavak om hen” ci in thu a piak pociang khua vak aa, Pathian zong na khuavak a mu ciang pha sa hi(Piancil 1:1-4). Tua hi aa khuavak om buathong le Pathian in a bitphua sa leitung van nuai a om theampo khiakna nei ngawl tu suak hi. Tu ni in ei thu um te a tu in khuavak ih cisia Pathian vangletna he te hi aa, khuazing ih cisia Pathian he ngawl te ih cina a hihi. Tuahu in ei thu um te in Pathian itna, Jesu thu thiamna a he ngawl lai te sung ah Pathian khuavak ih puak tek tu a thupi bel ih vaipuak tu a hihi.

Ei Zomi te bang sia khuavak kihe hak ahikom ih pu ih pa te sia khantona bulpi lai nei ngawl te ih hi malam hi. Tuahu in ih pianna ih suana zong a thuk vacin in kihe meal ngawl hi. Tu ni ih mu thei khang teptena te sungah Tedim ngam sung pan a piang teng in ih pupi sia “ZO” hi ci in teptena om bek hi.”ZO” sia koisung ngam ah suak aa ih pu “ZO” a sua ma in koisung ngam teng ah om hi ziam? Ih U ih nau te sia kuateng ziam? ci sia kihe zo nawn ngawl hi. A hihang ei Zomite sung ah khuvak sia 1899 kum ciang Haka ah hong puak masa aa America pan ih ngam ah khuavak hong puak masa bel te a hi hi. Tua khuavak sia ei Zomi te sung ah 1904 ciang Saya Shwezan hong puak sawn aa tua hun tua ni khuavak ih mu ni pan kipan ih nakheng tawm hong ciim zawhiat aa ih mit tawm hong vaak zawhiat hi. Lam khat pan cileang ei Zomi (Chin) te in ih taang thu kiciamte pheang suak hi. Tua a hile ei khuavak hong puak a hi America ngam le Khamtung ngam tawm enkakk leang ci in a nuai a bang in kong at suk hi.

America ngam sia khuavak hong puak ngam khat a hihang le leitung ah ngam khang to bel khat a hihang in Zomite sia

Seattle Khuapi

America thet thei natu lampi kizong siasua tek aa tam ma zong ih theng zo hi. Kei le ka zi zong ka ta te ii hong sapna hangin ka na theng thathong lei uh hi. Ih kawl ngam khuapi Yangon ah kum 17 bang MBC le YSBC ah Topa sila seam in ka om hi. A hihang ih kawl ngam le America ngam sia tam mama a na kisam lai thong hi. A kilamdanna pawl khat kong at suk tu hi.

(1) Online pan vanleang letmat kilei
Yangon pan 2010 Dec. 30 ni in Visa nga aa, visa ka nga thu ka son po te, ka tapa na vanleang letmat a om na, Washington State, Seattle pan hong leisak pai hi. Hong leisak dan sia Vanleang zum khawng pai vakhuan kul ngawl in, online pan na lei ziau aa, a sum sia a bank account sung pan pia lel hi. A air ticket sia internet pan ma hong thak pai ah hong thak po te ka nga pai hi.

(2) Sun le zan kilebul
Kawl ngam pan Bangkok air line taw February tha ni 1 ni nai 10 khawn ka din uh sia Bangkok aa nai 5 khawng ka tawlngak zawk uh te Eva Air line taw Taiwan ka na zuan uh hi. Taiwan pan nai 9 khawng dingkik sia nai 9 sung khawng ka len zawk uh te zingsang kuan theng tu ki um kasap nitaaksang nai 5 khawng ciang Seattle ka na theng uh hi. Ei ngam pan sun se amate ngam pan zan a na hi thonghial hi. Ei ngam pan ngam khua la belna ngam mong zong a hi hunlam kaphawkkik san hi.

(3) Phalbi khua sik hun
Kawl ngam pan Feb. tha sia khualum tu kithoai zo hikasap Seattle kathet nitaak a motor parkingna inn nuai kathet te pek velvol hong vot aa na aircon hon uh vot lei hiat kacitha hi. Ka tapa Kamcinthang inn kathet uh te eak buk zak dan an buuk an huan dan pa kipan a na kilamdang siat hi. A vekpi sin tawm pian vive hong kul thong hi. USA ih ci sia U Start Again hi ci in, ciamuina a ci sia man peuma kasa hi. Koi bang aa huai kuan tu te a thak a kipatkik leleau kul tu hi ta aa ci sia ka ngaisun ngeungo hi.

(4) US ngam nisuana sang le nitumna sang nai (3) kilamdang
Kawl ngam ih ii hun teptena nai sia kibang siat kasap a ngam le zai mama lei si hitana nitumna ko omna sang le nisuana ei mi tam bel na Maryland sia nai (3) takma kilamdang thong hial hi. Tua kawm pa April ni (13) ni hong thet te Seattle standard time sia nai khat hong khan to ziau hi. Zing sang nai (6) sia tua ni pan kipan nai (7) in hong lai to ziau aa. Cell phone le Computer theampo zong kilai siat pai hi.

(5) Football ci vanglak te khut zangh
Ei ngam pan kimaina ih thupisak bel bawlung sia peang taw kisui hikasap ama te aa thong hial sia a zawl piopuau khat sia khut taw kitu vangang ah football ma ci vive hi. Ei bawlung cisia Soccer po na ci hi. USA ngam khangto bel cikalei sia a lebul vive na hi thonghial hi.

Seattle Khuapi a ngaal pan

(6) America te mangkam thiam ngawl
America te sia mangkam pau ma kinei sia a pau te lop si, kuai kawm si pau thong hial sia kitel zo mama ngawl hi. India te mangkam pau a tuam, Kawl te mangkam pau a tuam, Sizang te mang kam pau zong a tuam ma ( Bo Suang Za Khai ii Mangkam sia Sizang aw sua taw a sim sia veu kaphawk kik hi) Tasia bang ma Asia te mang kam pau dan le African te mangkam awsua zong a tuampi khat hi

Example:- Mary land ah USSBC biak inn hong tu pai tu sia Detroit Wayne County airport ah transit ( Vanleang lai kul) sia vanleang tungpa ka tuakpo te, Maryland ah Baltimore airport pai tu koisung gate pai tu khiziam ci kadok le Eight thirty one hong ci venvon aa, kalaisai gate 831 dong om zezen hi ta aa ka ci ku hi. A mate sawl bang ka zon le A 31 gate kathet te hi sung ziam? Baltomore airport pai tu te gate ci in kadok ciang, hi hi hong ci ciang, A thirty one a ci tu sia Eight thirty one ci hi ta uh te ci kaphawk hi. Tasia thu Mary land kathet te lawm te kung kason le U Vum Son zong na US te mangkam pau sia kum (5) te katel thiang pheang ci hi, ci in hong son te kathin a nuam zaw hiat hi.

(7) Lan Sikan zui peu ma
Kawl ngam sia khat vavei tai man bua leang mawtaw na hong tai tu ma kithoai vasat thei kasap US bilbel sia mihing khat na lam kan tu a hi na le pi 50 khuala napa tawl ngak pai ek thongh hial hi. Mawtaw sia misim mana hawl ah a hi hang lam sikan sia khau thei peu ma hi. Ei ngam taw a kisap belna sia Law sia thupi sak mama . Ei kawl mi te ii law sia om aa zui kul ngawl ci bang thathong taw suak thei ngawl hi.

(8) US ah Mission sepkik hun zo
Kawl ngam ah Judson te nupa sia 1813 kum in a masa phit bel kawl ngam sung khuavak hong puak sia kum 200 cing dadawn zo hi. Ei khamtung ngam zong Carson te nupa ii khuavak hong puak sia kum 106 bang phazo hi. A hihang ei kawl ngam sung ah khuavak hong puak America Baptist Convention te sia kiamsuk mama hi. Biakinn ah nuhuai pahuai teng bek kikhawm aa pawl khat te sia a Biakinn a kikhawm tu ngangawn om nawn ngawl ci sia a hima hi tuak thong hi. Tulaitak sia Zomi te America tai tu Pathian lam hong honsak laitak hi aa, tamma zong kitheng zo, tamma zong kitheng lai tu ci in kilam en hi.

Seattle kathet zawk Rev. Dr. Hre Kio te nupa hong haw aa thu pawl khat kakikum thei uh hi. Ko Haka te bebek in US ah pawlpi 50 val kanei zo uh hong ci hi. Tua ahile Southern Baptist Convention(SBC) te taw kipawl zaw nu ziam maw. America Baptist Convention (ABC) taw kizom zaw nu ziam? ci kadok ciang (ABC) te taw kakizomm uh aa Association khat zong nei kasawm uh hong ci hi. Bang hang ABC te taw kipawl zaw nu ziam ci kadok ciang, Eima khuavak hong puak te hi aa amate tu, kiam suk ahiciang eima ih hanthotkik kul tu ci in kangaisun uh hong ci hi. Keima ngaisuatna taw hong kisi lian hi. MBC kasep sung 2006 kum kana ziam maw, Baptist World Alliance kikhoppi khat pan (SBC) te pusuak ci thu kahe ngei si hi. Tua hi aa (ABC) sia ei taw BWA dong ah a kizom sa (MBC, ZBC le SRBA ci te sia Leitung bup Baptist kipawl na BWA dong ah a kipawl khawm te ahikom BWA taw a kipawl ABC te taw kipawl tu sia lam man a hi hunlam zong kong pulaak nuam hi.

Tua ahikom US ah Sizang pawlpi thak ahi US Siyin Baptist Church (USSBC) zong a tung le a nuai kizopna sia ABC taw kizom tu (Vertical), le Horizontal sia SRBA le a kipepui theampo taw kizom tu ci sia USSBC ii vaipuak khat a hi sia zong kong zasak kawm pai hi.

Cinopna in na, eima ngam sung zong mission sep thei za sep tu bek hi ngawl in US ngam dong ah mission ih sep kik tu hun hi zo hi ci thu a hi hi. Banghang ziam ci le US a theng masa pawl khat zong nuamsa pian zo aa Pathian phawk nawn ngawl, mangil tu kipapan zo ci sia zong ih phaw tu khat hong hi si hi.

THU KHUP NA
Tua ahikom kawl ngam sung a om lai Pawlpi te ih hi zong, Mun tuatuam a om Pawlpi te theampo khut kilen aa Pathian thupha khuavak ih puak tek tu sia ih vaipuak lianbel hi ci sia a thupi bel hi sak leang ci in kong hanthawn nuam hi. Khuavak Magazine Topa’n thupha hong pia in khuavak apuak te khat sim ih hina tu Topa na thupha hong pia tek tahen.

Kip Thian Pau
USSBC Pastor

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,484 other subscribers

Leangna hong haw

  • 48,657 phazo

A LUITE SIM/EN KIK TAWNG

%d bloggers like this: