Articles

American Khangno Khat ii Tetti Panna

ThawngnoKa pa le ka nu hong kha-khaam kawm panma, kum 18 ka cin ni ciang, ka topsa sum tawm le ka zak tawm tu vanh pawl khat, ka Volkswagen mortor no tungah heang in ka pusuak hi. Keima le keima nungta tong ci in ka pa ka nu inn pan ka pusuak aa, California sang ka zuan hi. Needles khua pan ka pusua zawk bek, ka tawlngahna ah mihing pha-ngawl khat taw ka kimu aa, thau hong ngat in ka mortor le ka neisa theampo hong laaksak hi. Highway patrol (Police) te tung ka khiak le, tubangte kinga kik vazeang ngawl, mat tu haksa thei peuma hong ci zeio bek dom ngawl, highway lampi tungah ngual mortor zui nop hu, khut lap in kitawlnga sak thei ngawl hi. Hong kimu le hong kiman tu hi ci lalai tana, truck motor te tawlngahna dong lam seao in truck mortor hawl khat na Los Angles dong hong zui sak hi. Ka zak tawm tu $ 20 hong pia hi.

Will Rogers kicina mun, tuipi hui beach dong keima nguak lam ka seou hi. Will Rogers beach sia, nitaak khuamial hun hoi ka sa mama aa, nuam ka sa mama hi. Khua ziin dong beach ah ka tou aa, bang vawt leang phatu ziam ci ka ngaisun hi. Khua ziin ciang ka nei susun $ 20 pan tawm zangh in lam hui sai no khatah neak thei khat ka lei hi. Tua zawk ciang park khat sungah tua zan ka lum hi.

A zing ciang kipan ka nuntakna sia haksa mama hi. Kibual ngawl kahikom, ka cii hong niin mama aa, ka ngilkial ahikom, ka heak ngei ngawl mihingte tung pan ka an neak tu sum ka nget ngawl phamaw hi. Tha 2 bang kasik na mun theampo ah zan kalum kakoai hi. An sai le, ante thing-nga zuakna sai ci theampo ii niin vawkna munte ah, an lui, thing-nga pha ngawl a vawk sa te po zong vathuam in ka nungta hi. Ka pate thu ka zasak buale, a thin nuam ngawl tu ahiciang, ni khat ka sum nei susun tawm cilik sung pan $ 1 taw postcard ka lei aa, senpi khi hi, nasep thak khat nga khi hi ci in postcard tung ka at zawk ciang ka thak hi. Ka hibang tatak ka son tu sia, ka mai zum naap ahikom, ka theam hi.

Vawt tu sep tu dang peuma ka he bua aa, Santa Monica lam kiim teng ah kilele in, kamu theampo tungah khut daw in sum ka ngengen hi. Ni khat numei khat in $ 1 hong piak ka bongbi ip sung manlaang tatak ka koi zawk ciang, a hui ah hong ton khawm pasalpa tungah khut kadaw le, ka thin ka lung tamtham tu za dong in ka cimaw hi. Banghangziam cile tua pasalpa sia ka pa na hi thong hial hi. Ka muk ka kam pan bangma ka pau thei nawn bua hi. Ahihang ka pa in hong tel nawn bua aa sum neen pawl khat hong pia hi. An phatak ka neak ngawl zawk ngei zo ahikom, ka ngawmcip aa, ka samte niin in sau thilthul, ka cii zong niin bek dom ngawl ka mukmul le khamul zong sau thiapthuap thong tana ka pa nga-ngawn in hong tel nawn ngawl thong hi.

Ngaisun ngawl pipi ma, Pa awng, pa awng, keima khi ve, Scotty khi ve, ci in ka paupui hi. Ka pa in ka aw hong zaak ciang, phatatak hong en aa, ka pata kikoai thinthun in ka kap khawm uh hi. Ka cii niin in namsia mama hikaleang, ka pa in hong koai tinten aa, a kap vazuk hi. Atom in son to leang, tua nitak hotel khat ah ka kisil sitset zawk ciang vanleang letmat lei in ka pata ka cia uh hi. Ka pa in ka post card thaak a nga ciang keima hong vil tu in hong pai suk ci in a zawk ciang hong son kik hi.

Ka no lai Lai Thiangtho sung tapa taimangpa thu ka sim ciang, dik ka sa bua hi. Thupi ka sa ngei bua hi. Kei sia tabang ngina ngawl in pa le nu inn pan taithaap ngawl tu ci in ka ngaisun ngei hi. Ahihang tapa taimangpa inn cia kik bang in kei zong ka pa ka nu inn ah ka theng kik hi.

Kum te hong bo aa, ka pa le nu zong a nungta nawn bua hi. Ahihang kei le ka innkuanpui te sia ka pa le ka nu inn sungah tudong ka teang lai uh hi. Ka pa le ka nu hong ompui nawn ngawl papeet ciang ka phawk kik thu khat a om hi. Los Angeles khua sung ka pa tung khutdaw in sum ka nget lai, dollar khatpo nii po hi thong nginge. Tua ni ka pa tung pan ka nget sia tawm mama thupi ngawl het nginge hi, banghang ziam cile ka pa ahi hunlam ka heak pak ngawl hang hi. Mihing te in TOPA Pathian sia hong it ih pa, naa theampo hong pia zo ih pa ahihunlam ih tel tatak bua hi, tua ahikom Pathian tung pan a thupi ngawl ahi lalelpo ih ngen thei bul hi. Pathian na ei a tate hong it lalawm ahikom, khat bek a nei a tapa ngangawn haza ngawl in hong pia zo hi ngawl ziam? Pathian itna bangzata in lian aa, lamdang ziam?

Pathin in hong langpan ngawl het tu hi. Ama in a Tapa takpi khoaikhe ngawlin, ei atu in hong pia hi! A Tapa ngangawn hong pia ahile na theampo a thongin hong pia ngawl tu ziam?
(Romete 8 32).

Thawngno (February 10, 2015)

This post first appeared in the Siyin Bible 

 

 

Advertisements

Discussion

No comments yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

w

Connecting to %s

Rev. Dr. Thuam Cin Khai
Rev. Dr. Vungh Lian
Siyin chin baptist church

Enter your email address to follow this blog and receive notifications of new posts by email.

Join 2,487 other followers

Leangna hong haw

  • 45,164 phazo

A LUITE SIM/EN KIK TAWNG

Advertisements