Pathian Nah A Naseam Tu Nang Hong Dei

“Tua ahiciang pai tavun, mun theampo ah mihing namcin theampo ka nungzui suaksak tavun: Pa, Tapa le Tha Thiangtho min taw tui na phum tavun, taciang ka thu piakte theampo a zui natu hil tavun. Taciang hun bo dongin note taw kong omkhawm tawntung tu hi,” ci hi.” (Matthew 28:19-20)

Pathian nah a ngam a lei atu, thu um mi mihing khatsim hong dei a, hong zangh nuam hi. Keipo bangma thiamna nei bong, keipo ka kum haam lei zo, keipo bangma vawt zo tu hi bong, mihing ngina hi bong a ci theampo anuai thu ih he ziam?

• Moses sia thu son thiam ngawl a, a aw tawn vatut hi. (Pusuana 4:10)
• David sia ngaal thuam (ngaalsimna thikpuan) zong a sil thei ngawlpa hi. (1Samual 17:39)
• John Mark in Pathian nasep pui Paul nusia in taisan (Sawltakte 13:13)
• Kamsangpa Hosea ii zii sia numei phangawl thumaan ngawl khat hi (Hosea 1:2)
• Jacob sia a suapuipa theam in leilot thu son mihing khat hi.
• David sia ngual zii taw mawna a vawt pasal khat hi.
• Solomon sia hau citak hau hi.
• TOPA Jesu sia leitung mi bang anuntak lai zawng mama hi.
• Abraham sia Pathian in a zak hun lai haam mama zo hi.
• Pathian in David zangh tu a kipat lai moi mama lai hi.
• Peter sia thi tu a lau mama mihing khat hi.
• Pathian min a thang sak Lazarus sia mihing thisa khat hi leltak hi.
• Naomi sia mengong numei khat hi.
• Paul sia Jesu nungzui te thalup tu in a zazong mihing khat hi.
• Moses sia mihing thatpa hi nginge hi.
• Jonah sia Pathian sawlna seam nuam ngawl in a taithaap khat hi.
• Moses ii suapuinu Miriam sia kam nawnsan a pau haat mama numei hi.
• Gideon ahizong nungzui Thomas ahizong a mu vateak buale um vazeang thei ngawl hi.
• Jerimiah sia depression nga ama le ama a kithat nuampa hi.
• Tuiphum John sia kam pau a nasia (huibung) khat hi.
• Martha sia thin a ngim thei mama numei khat hi.
• Noah sia zu kham in a lulum thei pasal khat hi.
• Moses, Peter, le Paul te sia a thin tom valak mama pasal 3 hi.

Hi mihing teng sia Lai Thiangtho sungah Pathian ii zak bel mihing te ahi hi. Leitung nasep ih zon ciang interview kiphi a, ih ong le nasep kinga thei pheang hi. Ahihang Pathian ii ngupna thu sonkhia tu in Pathian nah bangma hun interview hong to sak ngawl a, eima kipia zaw po leang nasep hong pia pai hi.

Leitung nasep nah qualification hong ngen a, Pathian nah na thintak lungtak taw na kipiakhiatna bekma hong ngen hi. Leitung nasep in leitung na nuntak sung teng bekma hong vaak tu a, Pathian nasepna in a tawntung bo hun nei ngawl hong vaak tu a, thupha hong pia tu hi.

• Satan nah “Nang bang lelel Pathian naseam tu kilawm buate” hong ci hi.
• Jesu nah ”Na hi babang hong zuan tan” ci in hong sam hi.
• Satan nah na nungsang hong en sak kikik a, na mawna teng hong lak kikik hi.
• Jesu nah na maisang bekma hong en sak a, thinglaamte bekma hong lak hi.

Pathian nah hong zangh ngawl lai ahile, hong dei ngawl kii huai hong sak hang hi zaw ngawl a, nangma nah thin tak lungtak taw Pathian zuan ngawl lai hi zaw tu ni hi.

“Ngai vun! Keima in kongkha ah dingin ka kingh hi; khat po in ka aw hong za in kongkha hong hon le, inn sungah tumin, ama taw an ne khawmin ama zongh kei taw an ne khawm tu hi.” (Thupualaakna 3:20)